चौल, सावली आणि टोकेखार येथील बाधित खातेदारांना संमतीपत्र सादर करण्याचे आवाहन
अलिबाग, दि. ०१ : रेवस-रेड्डी सागरी महामार्गाच्या उभारणीसाठी आवश्यक असलेल्या जमिनींच्या भूसंपादनाची प्रक्रिया पुढे सरकली असून, बाधित खातेदारांना मोबदला देण्यास सुरुवात झाली आहे. अलिबाग तालुक्यातील चौल तसेच मुरुड तालुक्यातील सावली आणि टोकेखार येथील जमीनधारकांना मोबदला स्वीकारण्यासाठी संमतीपत्र सादर करण्याची संधी देण्यात आली आहे. यासाठी १ ऑक्टोबर २०२६ ही अंतिम मुदत असून, संबंधितांनी वेळेत कार्यवाही करावी, असे आवाहन उपविभागीय अधिकारी मुकेश चव्हाण यांनी केले आहे.
महाराष्ट्र महामार्ग अधिनियम १९५५ मधील कलम १९ (ब) अंतर्गत या गावांतील बाधित खातेदारांना भूसंपादनाचा मोबदला स्वीकारण्याबाबत २ सप्टेंबर २०२६ रोजी नोटिसा बजावण्यात आल्या होत्या. त्यानंतर काही खातेदारांनी मोबदला घेण्यासाठी आवश्यक संमतीपत्रे आणि करारपत्रे सादर केली आहेत. या कागदपत्रांच्या आधारे अलिबाग उपविभागीय अधिकारी कार्यालयामार्फत मोबदल्याचे वितरण सुरू करण्यात आले आहे.
चौल, सावली आणि टोकेखार येथील ज्या खातेदारांना जिल्हास्तरीय समितीने मंजूर केलेला मोबदल्याचा दर मान्य आहे, त्यांनी १ ऑक्टोबर २०२६ रोजी मुदत संपण्यापूर्वी संमतीपत्र सादर करणे आवश्यक आहे. यासाठी संबंधितांनी शासकीय सुट्ट्या वगळून कार्यालयीन वेळेत अलिबाग येथील उपविभागीय अधिकारी कार्यालयात प्रत्यक्ष उपस्थित राहावे.
दरम्यान, भूसंपादन होणाऱ्या जमिनी किंवा मिळकतींमध्ये अन्य व्यक्तींचाही कायदेशीर हितसंबंध असल्यास, त्यांना मोबदल्याबाबत हरकत नोंदवता येणार आहे. अशा व्यक्तींनी आपल्या दाव्याच्या समर्थनार्थ आवश्यक कागदपत्रे आणि पुरावे जोडून उपविभागीय अधिकारी, अलिबाग यांच्या कार्यालयात हरकत दाखल करावी, असे प्रशासनाने स्पष्ट केले आहे.
रेवस-रेड्डी सागरी महामार्गासाठी सुरू असलेल्या भूसंपादन प्रक्रियेत संबंधित खातेदारांनी निर्धारित मुदतीत संमतीपत्रे सादर करणे किंवा आवश्यक असल्यास पुराव्यांसह हरकत नोंदवणे महत्त्वाचे ठरणार आहे. त्यामुळे चौल, सावली आणि टोकेखार येथील बाधित जमीनधारकांनी मुदतीची दखल घेऊन आवश्यक कार्यवाही करावी, असे आवाहन उपविभागीय अधिकारी मुकेश चव्हाण यांनी केले आहे.
