१९ पैकी १४ जागांवर सहकार पॅनलचा विजय; अरविंद पाटील निलंगेकरांनी काकी संगीता पाटील निलंगेकरांचा पराभव केला, ऋषिकेश कराडही विजयी
लातूर, दि. १६ : लातूर जिल्हा मध्यवर्ती सहकारी बँकेच्या संचालक मंडळाच्या निवडणुकीत काँग्रेस नेते धीरज देशमुख यांच्या नेतृत्वाखालील सहकार पॅनलने १४ जागा जिंकत आपले वर्चस्व सिद्ध केले. दुसरीकडे, भाजपच्या परिवर्तन पॅनलने पाच जागांवर विजय मिळवला. त्यामुळे बँकेच्या निवडणुकीत सहकार पॅनलला बहुमत मिळाले असले, तरी परिवर्तन पॅनलनेही महत्त्वाच्या मतदारसंघांत यश मिळवले आहे.
या निवडणुकीतील सर्वाधिक चर्चेचा निकाल निलंगा मतदारसंघातून लागला. भाजप नेते आणि माजी मंत्री संभाजी पाटील निलंगेकर यांचे बंधू अरविंद पाटील निलंगेकर यांनी परिवर्तन पॅनलकडून निवडणूक लढवत आपल्या काकी संगीता अशोक पाटील निलंगेकर यांचा पराभव केला. या विजयासह त्यांनी प्रथमच लातूर जिल्हा मध्यवर्ती सहकारी बँकेच्या संचालक मंडळात प्रवेश केला.
ऋषिकेश कराड यांचाही विजय
भाजप आमदार रमेश कराड यांचे पुत्र ऋषिकेश कराड यांनीही परिवर्तन पॅनलकडून विजय मिळवला. त्यांनी काँग्रेसचे उमेदवार अशोक गोविंदपुरकर यांचा पराभव केला. त्यामुळे पाच जागा जिंकणाऱ्या परिवर्तन पॅनलच्या यशात निलंगेकर आणि कराड कुटुंबांतील उमेदवारांच्या विजयाची भर पडली.
सहकार पॅनलकडून धीरज देशमुख यांनी विजय मिळवला. दिवंगत माजी आमदार चंद्रशेखर भोसले यांच्या कन्या प्रीती भोसले यांनीही उदगीर सोसायटी मतदारसंघातून यश मिळवले. सहकार मंत्री बाबासाहेब पाटील यांचे जावई हेमंत जाधव हे देखील सहकार पॅनलचे विजयी उमेदवार ठरले.
दोन्ही पॅनलचे विजयी उमेदवार
सहकार पॅनल — १४ जागा
हेमंत जाधव, आशिष पाटील राजूरकर, संतोष पाटील, धीरज देशमुख, जगन्नाथ पाटील, जयेश माने, सर्जेराव मोरे, विवेक सिरसाठ, अविनाश जाधव, शेषेराव हाके, चंद्रशेखर दंडिमे, शितल पाटील, गीतांजली लांडगे आणि प्रीती भोसले.
परिवर्तन पॅनल — ५ जागा
अरविंद पाटील निलंगेकर, अतुल गंभीरे, भगवानराव पाटील तळेगावकर, ऋषिकेश कराड आणि शोभा पवार.
जयेश माने यांना ४५ पैकी ३५ मते
मत्स्य आणि गृहनिर्माण मतदारसंघातून सहकार पॅनलचे जयेश विश्वंभर माने यांनी ४५ पैकी ३५ मते मिळवत विजय नोंदवला. याच मतदारसंघातून परिवर्तन पॅनलचे भगवानदादा पाटील पटवारी हेही विजयी झाले.
उदगीर सोसायटी मतदारसंघात सहकार पॅनलच्या प्रीती चंद्रशेखर भोसले यांनी १० मतांच्या फरकाने विजय मिळवला. सहकार पॅनलचे संतोष पाटील यांनीही निवडणुकीत बाजी मारली.
९९.४ टक्के मतदानाची नोंद
लातूर जिल्हा मध्यवर्ती सहकारी बँकेच्या संचालक मंडळात एकूण १९ जागा आहेत. त्यापैकी चार जागा यापूर्वीच बिनविरोध झाल्या होत्या. उर्वरित १५ जागांसाठी मतदान झाले. या निवडणुकीत ९९९ पैकी ९९३ मतदारांनी मतदानाचा हक्क बजावला. त्यामुळे ९९.४ टक्के मतदानाची नोंद झाली.
सहकार आणि परिवर्तन या दोन पॅनलमध्ये झालेल्या या लढतीकडे जिल्ह्यातील राजकीय वर्तुळाचे लक्ष लागले होते. काँग्रेस नेते धीरज देशमुख आणि भाजप नेते संभाजी पाटील निलंगेकर यांच्यासाठीही ही निवडणूक प्रतिष्ठेची मानली जात होती. अंतिम निकालात सहकार पॅनलने बहुमत मिळवले, तर परिवर्तन पॅनलने पाच जागा जिंकत बँकेच्या राजकारणातील आपले अस्तित्व अधोरेखित केले.

