शारीरिक मानसिक आरोग्यासाठी नियमित योग आवश्यक: ज्येष्ठ योगगुरू मनमोहन भुतडा

सोलापूर, दि.१३: शारीरिक आणि मानसिक आरोग्यासाठी नियमित योग करणे आवश्‍यक आहे. त्यामुळे शरीर मन आणि आत्मा एकमेकांना जोडले जातात आणि शांततेची अनुभूती प्राप्त होते, असे मत योग सेवामंडळाचे संस्थापक अध्यक्ष तथा ज्येष्ठ योगगुरू मनमोहन भुतडा यांनी आज येथे व्यक्त केले.

भारत सरकारच्या माहिती आणि प्रसारण मंत्रालयाच्या क्षेत्रिय लोकसंपर्क ब्‍युरो, सोलापूर आणि योगसेवा मंडळ, सोलापूर यांच्या वतीने आयोजित ‘योगउत्सव २०२२’ या कार्यक्रमात भुतडा बोलत होते. यावेळी व्यासपीठावर क्षेत्रीय प्रचार अधिकारी अंकुश चव्हाण योगसेवा मंडळाचे अध्यक्ष सुनील आळंद, सचिव जितेंद्र महामुनी, सुजाता बीडकर, सतीश अग्रवाल,.आनंद काळे, माजी अधिकारी, सतीश घोडके आदी मान्यवर उपस्थित होते.

आठव्‍या आंतरराष्ट्रीय योग दिनाच्या निमित्ताने विशेष पंधरवडा योग प्रशिक्षण कार्यक्रमाचे आयोजन केले आहे. योग हा एक दिवस करण्याचा नसून तो आपल्या दररोजच्या दिनचर्येचा एक भाग झाला पाहिजे असे मत यावेळी भुतडा यांनी व्यक्त केले. तसेच शिवस्मारक येथे होणाऱ्या योग शिबिरामध्ये जास्तीत जास्त लोकांनी सहभाग घ्यावा आणि आंतरराष्ट्रीय योग दिन यामध्ये आपले योगदान द्यावे असे आवाहन त्यांनी यावेळी केले.