५ जुलै रोजी ठाकरे बंधू मोर्चानिमित्त येणार एकत्र ! भाजप-शिंदे गटाच्या छातीत धडकी

मुंबई, दि. २७: महाराष्ट्रातील शाळांमध्ये इयत्ता पहिलीपासून लागू करण्यात आलेल्या हिंदी भाषेच्या सक्तीविरोधात काल उद्धव ठाकरे यांच्या शिवसेनेने व राज ठाकरे यांच्या मनसेने मोर्चाची हाक दिली होती. शिवसेनेचा मोर्चा ७ जुलै रोजी होणार होता. तर मनसेचा मोर्चा ६ जुलै रोजी होणार असल्याची घोषणा करण्यात आली. परंतु, काही वेळातच मनसेने आपल्या मोर्चाचा दिवस बदलून ५ जुलै केला. राज ठाकरे यांनी आधी जाहीर केलेला दिवस अचानक का बदलला याबाबत सस्पेन्स होता. आज सकाळी शिवसेना उद्धव बाळासाहेब ठाकरे गटाचे नेते खासदार संजय राऊत यांनी आधी एक्स(Twitter) या समाजमाध्यमाच्या मार्फत पोस्ट करत व त्यानंतर पत्रकार परिषदेत मोठा राजकीय बॉंब टाकत कालचा सस्पेन्स उघड केला. शिवसेना ठाकरे गट व मनसे यांचा संयुक्त मेळावा होणार असून त्याबाबतची घोषणा यावेळी संजय राऊत यांनी केली. यावेळी ते म्हणाले कि काल मातोश्री येथे बैठक आटोपून मी बाहेर पडत असताना मनसे अध्यक्ष राज ठाकरे यांचा मला फोन आला. राज ठाकरे यांनी जाहीर केलेल्या मोर्चाच्या तारखेबाबत आपण अनभिज्ञ होतो. हिंदी भाषेच्या सक्ती व त्रिभाषा सुत्रा विरोधात दोन मोर्चे निघणे योग्य दिसत नसल्याचे यावेळी राज ठाकरे म्हणाले. त्यामुळे दोन्ही पक्षांचे मोर्चे एकाच दिवशी म्हणजेच ५ जुलै रोजी एकत्र काढण्याचा निर्णय घेण्यात आल्याचे खासदार संजय राऊत म्हणाले.