नेरे-पनवेल येथील महालक्ष्मी नगर च्या प्रवेशद्वाराला अडचणीच्या ठरणार्‍या अनधिकृत बांधकामाविरोधात सिडकोकडे तक्रार दाखल

या आधी सन २०२० साली महाराष्ट्र वार्ता च्या ‘आपली समस्या’ टीम ने बातमी प्रसारित करत या समस्येकडे प्रशासनाचे लक्ष वेधण्याचा प्रयत्न केला होता. परंतु, कोविड काळात सिडको प्रशासनाने याकडे दुर्लक्ष केले. परंतु आता लेखी तक्रार दाखल झाल्यामुळे प्रशासनाला नक्कीच याची दखल घ्यावी लागेल. या संबंधी माहिती देताना सामाजिक कार्यकर्ते अतुल शिलवंत म्हणाले की, “गेल्या काही काळापासून महालक्ष्मी नगर व या डेव्हलपर्स शी संबंधित अनेक तक्रारी माझ्याकडे येत होत्या. अखेर संबंधित कागदपत्रांचा अभ्यास केल्यावर विकासक अनिश मेहता याने केलेला गोलमाल समोर आला. अंदाजे ३५-४० एकर वर पसरलेल्या या निवासी संकुलात जर भविष्यात काही नैसर्गिक आपत्ती अथवा आग लागणे असे काही बिकट प्रसंग उद्भवले तर अशा वेळी अग्निशमन दलाच्या वाहनांना एवढ्या छोट्या वाटेतुन आत प्रवेश करणे अशक्य आहे. अशा वेळी मोठी जीवित हानी होण्याची शक्यता जास्त आहे.” पुढे शिलवंत म्हणाले की, “मी स्वतः या ठिकाणी येऊन पाहणी केली असता जाणवले की संकुलात प्रवेश करण्यासाठी असलेल्या या मुख्य प्रवेशद्वारातून एकावेळी एकाच चार चाकी वाहनाला प्रवेश करणे शक्य आहे. शेवटी रस्ता अडवणार्‍या महालक्ष्मी नगर शॉपिंग मॉल शी संबंधीत या अवैध बांधकामाविरोधात १६ जून २०२३ रोजी आम्ही सिडको प्रशासनाकडे महाराष्ट्र प्रादेशिक आणि नगर नियोजन अधिनियम(MRTP) च्या कलम 53(1) नुसार तात्काळ कारवाई करण्यासंबंधी लेखी पत्र दिले.”

महालक्ष्मी शॉपिंग कॉम्प्लेक्स जवळ या विकासकाने कलेक्टर मंजूर प्लान प्रमाणे बांधकाम न करता याच जागेच्या बाजूला असलेल्या गवते नामक जमीन मालकाची जमीन विकत घेण्याचे फक्त खोटे आश्वासन देत काही वर्षे तिचा नुसताच वापर केला. अखेर ७ वर्षांपूर्वी गवते यांनी कोर्टाचं दार ठोठावत आपली जमीन ताब्यात घेत ती खणून त्याला कुंपण घातलं. कायद्याप्रमाणे ती त्यांची स्वतःची संपत्ती असून त्या ठिकाणी ते काहीही करण्यास मोकळे आहेत. मुळात एवढ्या मोठ्या संकुलात प्रवेश करण्यासाठी रस्ता छोटा असल्याच्या बाबीकडे सिडको नैना प्राधिकरणाने स्वतःहून लक्ष घालत विकासकाने केलेले अवैध बांधकाम पाडत रस्ता मंजूर आराखड्याप्रमाणे मोकळा करून देणे आवश्यक होते. गेली अनेक वर्षे या विभागातील नागरिकांच्या समस्या मांडताना महाराष्ट्र वार्ता टीमच्या नजरेत प्रशासनाचा मुडदाडपणा प्रकर्षाने जाणवला. महालक्ष्मी नगर संकुलातील रस्त्याची ही समस्या मार्गी लागली तर येथील घरांचे दर नक्कीच २५ ते ३० टक्क्यांनी वधारतील यात शंकाच नाही. बाकी या संकुलातील घर मालकांना विकासकाने दिलेली स्विमिंग पूल सह इतर आश्वासने हवेतच विरली आहेत. नियमाप्रमाणे महालक्ष्मी नगर डेव्हलपर्स ने येथील घर मालकांना कन्व्हेयन्स डीड करून देणे अपेक्षित होते. परंतु त्याने या संबंधी अद्याप कोणतेही पाऊल उचललेले नाही. विकासक अनिश मेहता याने जो निर्लज्जपणाचा कळस गाठला आहे त्याची फळं महालक्ष्मी नगर सोबत नेरे ग्रामस्थांना ही भोगावी लागत आहेत.