छत्रपती शिवाजी महाराज टर्मिनस ते सावंतवाडी रोडदरम्यान दररोज धावणार नवी एक्स्प्रेस
नवी दिल्ली/मुंबई, दि. १ : मुंबई आणि दक्षिण कोकण यांच्यातील रेल्वे प्रवास अधिक सुलभ करण्याच्या दिशेने भारतीय रेल्वेने महत्त्वाचा निर्णय घेतला आहे. छत्रपती शिवाजी महाराज टर्मिनस (मुंबई) ते सावंतवाडी रोड या मार्गावर नवीन दैनिक एक्स्प्रेस रेल्वे सुरू करण्यास मंजुरी देण्यात आली असून, या सेवेमुळे कोकणातील प्रवाशांना आणखी एक नियमित आणि थेट रेल्वे पर्याय उपलब्ध होणार आहे. सुमारे ५१० किलोमीटर अंतरावरील ही सेवा मुंबई महानगर प्रदेश आणि कोकणातील महत्त्वाच्या शहरांमधील संपर्क अधिक मजबूत करणार असल्याची अपेक्षा आहे.
भारतीय रेल्वेच्या मंजुरीनुसार, गाडी क्रमांक १५०८७ ही छत्रपती शिवाजी महाराज टर्मिनस–सावंतवाडी रोड एक्स्प्रेस, तर गाडी क्रमांक १५०८८ ही सावंतवाडी रोड–छत्रपती शिवाजी महाराज टर्मिनस एक्स्प्रेस म्हणून दररोज धावणार आहे. नियमित स्वरूपातील ही सेवा कोकण मार्गावरील वाढत्या प्रवासी मागणीला प्रतिसाद देणारी ठरणार आहे.
अनेक महत्त्वाच्या स्थानकांवर थांबा
या नवीन एक्स्प्रेसला प्रवाशांच्या सोयीसाठी दादर, ठाणे, पनवेल, पेण, रोहा, माणगाव, वीर, खेड, चिपळूण, सावर्डा, अरावली रोड, संगमेश्वर रोड, रत्नागिरी, अदावली, विलवडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ आणि सावंतवाडी रोड या स्थानकांवर व्यावसायिक थांबे देण्यात आले आहेत. त्यामुळे मुंबई, ठाणे, रायगड, रत्नागिरी आणि सिंधुदुर्ग जिल्ह्यांतील प्रवाशांना अधिक सोयीस्कर रेल्वे सुविधा उपलब्ध होणार आहे.
पर्यटन आणि स्थानिक अर्थव्यवस्थेला मिळणार चालना
या रेल्वे सेवेचा सर्वाधिक फायदा दक्षिण कोकणातील पर्यटन क्षेत्राला होण्याची अपेक्षा आहे. समुद्रकिनारे, ऐतिहासिक किल्ले, धार्मिक स्थळे आणि निसर्गरम्य पर्यटनस्थळांकडे जाणाऱ्या पर्यटकांसाठी प्रवास अधिक सोयीचा होणार आहे. त्याचबरोबर शिक्षण, रोजगार, व्यवसाय आणि इतर कारणांसाठी मुंबई–कोकणदरम्यान नियमित प्रवास करणारे विद्यार्थी, नोकरदार, व्यापारी आणि लघुउद्योजक यांनाही या सेवेचा मोठा लाभ मिळणार आहे.
वाढत्या प्रवासी मागणीला प्रतिसाद
कोकण रेल्वे मार्गावरील वाढती प्रवासी संख्या लक्षात घेऊन ही सेवा सुरू करण्याचा निर्णय घेण्यात आला आहे. या निर्णयामुळे प्रवाशांचा प्रवास अधिक सुरळीत होण्याबरोबरच प्रादेशिक आर्थिक विकासालाही चालना मिळेल. तसेच मुंबई आणि कोकण यांच्यातील दळणवळण अधिक सक्षम करण्यासाठी भारतीय रेल्वेच्या प्रयत्नांना बळ मिळणार आहे.
नवीन दैनिक एक्स्प्रेसच्या माध्यमातून प्रवासी संपर्काचा विस्तार, अधिक चांगल्या सुविधा आणि संतुलित प्रादेशिक विकास या उद्दिष्टांना गती मिळणार असून, कोकणातील नागरिकांची दीर्घकाळापासूनची आणखी एका नियमित रेल्वे सेवेची अपेक्षा अखेर पूर्ण होत असल्याची भावना प्रवाशांकडून व्यक्त केली जात आहे.
