‘झाडे लावा, झाडे जगवा’चा संदेश राज्यभर
मुंबई, दि. १४ : महाराष्ट्र राज्य मार्ग परिवहन महामंडळाच्या ७८ व्या वर्धापन दिनानिमित्त राज्यभर व्यापक वृक्षारोपण अभियानाला प्रारंभ करण्यात आला. विद्या विहार येथील विभागीय कार्यालयातून परिवहन मंत्री तथा महाराष्ट्र राज्य मार्ग परिवहन महामंडळाचे अध्यक्ष प्रताप सरनाईक यांच्या हस्ते या राज्यव्यापी उपक्रमाचा शुभारंभ झाला. या अभियानाच्या माध्यमातून राज्यातील एसटीची बसस्थानके, आगारे, विभागीय कार्यालये तसेच इतर विविध परिसरात मोठ्या प्रमाणावर वृक्षारोपण करण्यात आले.
या कार्यक्रमाला आमदार दिलीप लांडे, एसटी महामंडळाचे उपाध्यक्ष व व्यवस्थापकीय संचालक डॉ. माधव कुसेकर, तसेच महामंडळाचे वरिष्ठ अधिकारी, कर्मचारी आणि विविध विभागांचे प्रतिनिधी उपस्थित होते. पर्यावरण संरक्षण आणि हरित महाराष्ट्राच्या निर्मितीसाठी एसटी महामंडळाने घेतलेला हा उपक्रम सामाजिक बांधिलकीचा भाग असल्याचे यावेळी अधोरेखित करण्यात आले.
परिवहन मंत्री प्रताप सरनाईक म्हणाले की, “आजचा कार्यक्रम हा केवळ वृक्षारोपणापुरता मर्यादित नसून भावी पिढ्यांसाठी हिरवा, समृद्ध आणि सुरक्षित महाराष्ट्र घडविण्याचा सामूहिक संकल्प आहे. वाढते जागतिक तापमान, अनियमित पर्जन्यमान, अतिवृष्टी, दुष्काळ, पूर आणि उष्णतेच्या लाटांसारख्या पर्यावरणीय संकटांचा सामना करण्यासाठी प्रत्येक नागरिकाने पर्यावरण संवर्धनाची जबाबदारी स्वीकारणे आवश्यक आहे.”
ते पुढे म्हणाले की, “झाडे ही पृथ्वीची फुफ्फुसे असून ती प्राणवायू पुरवतात, कार्बन डायऑक्साइड शोषून घेतात, तापमान नियंत्रित ठेवतात आणि पर्यावरणाचे संतुलन राखण्यास महत्त्वाची भूमिका बजावतात. त्यामुळे एक झाड लावणे म्हणजे भविष्यातील अनेक संकटांवर उपाय उभा करणे होय.”
परिवहन मंत्री सरनाईक यांनी सांगितले की, एसटी महामंडळ हे केवळ प्रवाशांना सेवा देणारे परिवहन माध्यम नसून समाजाशी घट्ट नाळ जोडलेली सामाजिक संस्था आहे. त्यामुळे समाजहित, पर्यावरण संरक्षण आणि शाश्वत विकासासाठी अशा उपक्रमांची अंमलबजावणी करणे ही एसटीची सामाजिक जबाबदारी आहे.
वृक्षारोपणानंतर त्या रोपांचे संगोपन आणि संरक्षण करणे अधिक महत्त्वाचे असल्याचे त्यांनी विशेषत्वाने नमूद केले. “वृक्षारोपण करून जबाबदारी संपत नाही, तर प्रत्येक रोप जगविणे, त्याचे संगोपन करणे आणि संरक्षण करणे हे अधिक महत्त्वाचे आहे,” असे सांगत त्यांनी “एक कर्मचारी – एक वृक्ष” आणि “एक नागरिक – एक वृक्ष” हा संकल्प प्रत्येकाने स्वीकारावा, असे आवाहन केले.
एसटीच्या प्रत्येक आगारात, बसस्थानकात आणि कार्यालय परिसरात अधिकाधिक हिरवाई निर्माण करण्यासाठी अधिकारी, कर्मचारी आणि प्रवाशांनी सक्रिय सहभाग नोंदवावा, असे आवाहनही त्यांनी केले. पर्यावरण संवर्धन ही शासन किंवा एखाद्या संस्थेची एकट्याची जबाबदारी नसून प्रत्येक नागरिकाची सामूहिक जबाबदारी असल्याचे त्यांनी अधोरेखित केले.
एसटी महामंडळाच्या ७८ व्या वर्धापन दिनानिमित्त आयोजित या राज्यव्यापी अभियानातून “झाडे लावा, झाडे जगवा” हा संदेश राज्यातील प्रत्येक घरापर्यंत पोहोचविण्याचा प्रयत्न करण्यात येत आहे. निसर्गाचे संरक्षण म्हणजे मानवजातीचे संरक्षण असल्याचे सांगत हरित, स्वच्छ आणि पर्यावरणपूरक महाराष्ट्र घडविण्यासाठी सर्वांनी एकजुटीने कार्य करण्याचे आवाहन परिवहन मंत्री प्रताप सरनाईक यांनी केले.
राज्यभर राबविण्यात आलेल्या या उपक्रमामुळे पर्यावरण संवर्धनाबाबत जनजागृती होण्यास मदत होणार असून, शासकीय संस्था आणि नागरिकांच्या संयुक्त सहभागातून हरित महाराष्ट्राच्या दिशेने आणखी एक महत्त्वाचे पाऊल उचलण्यात आल्याचे मानले जात आहे.
