पावसाअभावी १ हेक्टर २० आर क्षेत्रातील पिकाचे नुकसान
छत्रपती संभाजीनगर, दि. ९ : छत्रपती संभाजीनगर जिल्ह्यातील देमनी शिवारात पावसाच्या अभावामुळे सोयाबीनचे पीक पूर्णपणे करपल्याचे चित्र समोर आले आहे. मराठवाड्यातील दुष्काळी परिस्थितीचा आढावा घेण्यासाठी आलेल्या केंद्रीय पथकाने शुक्रवारी, ९ ऑक्टोबर रोजी या शेताची पाहणी केली. यावेळी पथकाने संबंधित शेतकऱ्याशी संवाद साधून पिकाची स्थिती आणि नुकसानीची माहिती जाणून घेतली.
देमनी येथील शेतकरी विलास देविदास शिंदे यांच्या गट क्रमांक ८४ मधील १ हेक्टर २० आर क्षेत्रावर सोयाबीनची लागवड करण्यात आली होती. मात्र, पावसाअभावी या क्षेत्रातील संपूर्ण पीक करपून गेले आहे. प्रत्यक्ष शेतात जाऊन पाहणी केल्यामुळे पिकाच्या सद्यस्थितीची माहिती केंद्रीय पथकाला मिळाली.
या पाहणीसाठी आलेल्या पथकाचे नेतृत्व कृषी व शेतकरी कल्याण विभागाचे संयुक्त सचिव तथा मुख्य कार्यकारी अधिकारी मुक्तानंद अग्रवाल यांनी केले. पथकात महालनोबिस राष्ट्रीय पीक पूर्वानुमान केंद्राचे उपसंचालक सुनील कुमार दुबे, नीती आयोगाचे सल्लागार डॉ. जसपाल सिंग आणि पशुसंवर्धन व दुग्धव्यवसाय विभागाच्या पशुधन अधिकारी डॉ. साक्षी भदौरिया यांचा समावेश होता.
राज्याच्या वतीने कृषी विभागाचे सचिव परिमल सिंग, जिल्हाधिकारी विनय गौडा जी. सी. तसेच स्थानिक प्रशासनातील अधिकारी या वेळी उपस्थित होते. मराठवाड्यातील दुष्काळी परिस्थितीच्या पाहणीदरम्यान देमनी येथील सोयाबीन पिकाची झालेली हानी समोर आली आहे. पावसाच्या कमतरतेचा शेतीवर झालेला परिणाम समजून घेण्याच्या दृष्टीने ही पाहणी महत्त्वाची ठरली.
