तपासणीत उंदीर, झुरळे आणि मांजरी आढळल्याचा दावा; अन्नपदार्थांची खरेदी-विक्री तातडीने थांबवण्याचे आदेश
मुंबई, दि. २९ : मुंबईतील प्रसिद्ध इराणी उपाहारगृहांपैकी एक असलेल्या क्यानी अँड कंपनीवर अन्न व औषध प्रशासनाने (एफडीए) कारवाई केली आहे. खाद्यपदार्थांची साठवणूक आणि स्वच्छतेबाबत गंभीर त्रुटी आढळल्याने या उपाहारगृहाचा भारतीय अन्न सुरक्षा आणि मानक प्राधिकरणाचा (एफएसएसएआय) परवाना निलंबित करण्यात आला आहे. अन्नसुरक्षेच्या नियमांचे उल्लंघन झाल्याच्या पार्श्वभूमीवर प्रशासनाने उपाहारगृह तातडीने बंद करण्याचे निर्देश दिले आहेत.
दक्षिण मुंबईतील कालबादेवी परिसरात असलेल्या क्यानी अँड कंपनीची स्थापना १९०४ मध्ये झाली होती. मुंबईतील जुन्या इराणी उपाहारगृहांमध्ये या आस्थापनेचा समावेश होतो. मात्र, अन्न व औषध प्रशासनाच्या २७ सप्टेंबर रोजी झालेल्या तपासणीत स्वच्छतेच्या नियमांचे पालन होत नसल्याचे आढळल्याने या ऐतिहासिक उपाहारगृहावर कारवाई करण्यात आली.
तपासणीत अस्वच्छता आणि अन्नसुरक्षेतील त्रुटी उघड
तपासणीदरम्यान खाद्यपदार्थ तयार करण्याच्या आणि साठवणुकीच्या ठिकाणी मांजरी, उंदरांची विष्ठा तसेच जिवंत आणि मृत झुरळे आढळल्याचे वृत्त आहे. रेफ्रिजरेटरमध्ये रक्त साचलेले असल्याचेही तपासणीत समोर आले. याशिवाय, अन्नप्रक्रिया विभागात सांडपाण्याची उघडी गटारवाहिनी आढळल्याची माहिती देण्यात आली आहे.
खाद्यपदार्थ थेट जमिनीवर ठेवण्यात आले होते. कच्च्या पिठावर छापील वर्तमानपत्रे झाकण्यासाठी वापरली जात असल्याचेही अधिकाऱ्यांच्या निदर्शनास आले. कच्चे आणि तयार खाद्यपदार्थ वेगवेगळे ठेवण्याच्या नियमांचे पालन होत नसल्याचे तसेच कर्मचाऱ्यांकडून आवश्यक स्वच्छता आणि वैयक्तिक संरक्षणाच्या साधनांचा वापर केला जात नसल्याचेही आढळले.
या त्रुटींमुळे ग्राहकांच्या आरोग्याला धोका निर्माण होऊ शकतो, असे निरीक्षण नोंदवत प्रशासनाने परवाना निलंबित करण्याची कारवाई केली. संबंधित आस्थापनाला खाद्यपदार्थांची खरेदी, निर्मिती, प्रक्रिया, साठवणूक, विक्री आणि वितरण तातडीने बंद करण्याचे निर्देश देण्यात आले आहेत.
राज्यभरातील ३० आस्थापनांवर कारवाई
सणासुदीच्या काळात अन्नपदार्थांची सुरक्षितता सुनिश्चित करण्यासाठी अन्न व औषध प्रशासनाकडून राज्यभर विशेष तपासणी मोहीम राबवण्यात येत आहे. ‘सुरक्षित अन्न, सुरक्षित महाराष्ट्र’ या उपक्रमांतर्गत करण्यात आलेल्या कारवाईत राज्यातील एकूण ३० खाद्य आस्थापनांचे परवाने निलंबित करण्यात आले आहेत.
यापैकी मुंबईतील १३, कोकण विभागातील ६, पुणे विभागातील ८ आणि छत्रपती संभाजीनगर विभागातील ३ आस्थापनांचा समावेश आहे. मुंबईतील लोअर परळ येथील फिनिक्स मिल्समधील सबवेच्या एका शाखेवरही ग्राहकाच्या तक्रारीनंतर तपासणी करण्यात आली. तेथे रेफ्रिजरेटरमध्ये बुरशी आणि जिवंत झुरळे, स्वयंपाकघराच्या जमिनीवर साचलेले पाणी तसेच कामगाराच्या वापरलेल्या जॅकेटच्या संपर्कात ठेवलेले कच्चे खाद्यपदार्थ आढळल्याचे वृत्त आहे. या शाखेचाही परवाना निलंबित करण्यात आला.
नियमभंग करणाऱ्यांवर कठोर कारवाईचा इशारा
अन्न व औषध प्रशासनाचे आयुक्त तुकाराम मुंढे यांनी मुदत संपलेले, भेसळ केलेले किंवा अस्वच्छ पद्धतीने तयार केलेले खाद्यपदार्थ विकणाऱ्या अथवा साठवणाऱ्या आस्थापनांवर कायदेशीर कारवाई सुरूच राहणार असल्याचे सांगितले आहे.
मुंबईतील जुन्या आणि प्रसिद्ध खाद्यसंस्थांपैकी एक असलेल्या क्यानी अँड कंपनीवर झालेल्या या कारवाईमुळे अन्नपदार्थांची स्वच्छता, साठवणूक आणि सुरक्षिततेचे नियम पाळण्याचा मुद्दा पुन्हा चर्चेत आला आहे. प्रशासनाच्या पुढील तपासण्या आणि नियमपालनाबाबतची कार्यवाही याकडे आता लक्ष लागले आहे.
