राष्ट्रीय ओबीसी मुक्ती मोर्चाचे मुख्यमंत्री देवेंद्र फडणवीस यांना निवेदन; फुले यांच्या द्विशताब्दीनिमित्त मागण्यांकडे लक्ष वेधले
पुणे/मुंबई, दि. ११ : पुण्याला महात्मा जोतिबा फुले यांचे नाव देण्याची मागणी पुन्हा एकदा पुढे आली आहे. शहराचे नाव ‘फुलेनगर’ करावे आणि महात्मा फुले यांना मरणोत्तर भारतरत्न पुरस्काराने सन्मानित करावे, अशा दोन प्रमुख मागण्या राष्ट्रीय ओबीसी मुक्ती मोर्चाने मुख्यमंत्री देवेंद्र फडणवीस यांच्याकडे केल्या आहेत. नागपूर येथे मुख्यमंत्र्यांची भेट घेऊन संघटनेच्या पदाधिकाऱ्यांनी यासंदर्भातील निवेदन सादर केले.
महात्मा जोतिबा फुले यांच्या द्विशताब्दी वर्षाच्या पार्श्वभूमीवर या मागण्यांना विशेष महत्त्व असल्याचे संघटनेने निवेदनात नमूद केले आहे. फुले यांनी शिक्षण, सामाजिक समता आणि सुधारणांच्या क्षेत्रात केलेले कार्य लक्षात घेता, त्यांच्या कार्यभूमीशी संबंधित पुणे शहराला ‘फुलेनगर’ असे नाव देण्यात यावे, अशी संघटनेची भूमिका आहे.
या नामकरणासाठी राज्य सरकारने आवश्यक तो ठराव लवकरात लवकर मंजूर करावा, अशी मागणीही मोर्चाने केली आहे. त्याचबरोबर महात्मा फुले यांच्या सामाजिक आणि शैक्षणिक योगदानाची राष्ट्रीय स्तरावर दखल घेऊन त्यांना भारतरत्न पुरस्कार प्रदान करावा, असेही निवेदनात म्हटले आहे.
राष्ट्रीय ओबीसी मुक्ती मोर्चाच्या पदाधिकाऱ्यांनी नागपूर येथे मुख्यमंत्री देवेंद्र फडणवीस यांची प्रत्यक्ष भेट घेत दोन्ही मागण्यांचे निवेदन त्यांच्याकडे दिले. या मागण्यांवर राज्य सरकार कोणती भूमिका घेते आणि पुढील कार्यवाही काय होते, याकडे आता लक्ष लागले आहे.
