६७९ औषध ब्रँडच्या किमती ५० टक्क्यांहून अधिक घटल्या; रुग्णांची वार्षिक ३,५४० कोटी रुपयांपेक्षा अधिक बचत होण्याचा अंदाज
मुंबई, दि. १० : कर्करोगाच्या उपचारांसाठी वापरल्या जाणाऱ्या औषधांचा खर्च कमी करण्याच्या दृष्टीने केंद्र सरकारने महत्त्वाचे पाऊल उचलले आहे. राष्ट्रीय औषध मूल्य निर्धारण प्राधिकरणाने (एनपीपीए) निश्चित केलेल्या व्यापारी लाभांश मर्यादेनंतर १,३६४ औषधांच्या सुधारित कमाल किरकोळ किमती ९ नोव्हेंबर २०२६ पासून लागू झाल्या आहेत. या बदलामुळे अनेक औषधांच्या किमतीत लक्षणीय घट झाली असून, कर्करोग रुग्ण आणि त्यांच्या कुटुंबीयांना आर्थिक दिलासा मिळण्याची अपेक्षा आहे.
रसायन आणि खते मंत्रालयाच्या औषधनिर्माण विभागांतर्गत कार्यरत असलेल्या एनपीपीएने कर्करोगावरील १३७ औषधांच्या कमाल किरकोळ किमतींवर व्यापारी लाभांशाची मर्यादा निश्चित केली आहे. आरोग्य आणि कुटुंब कल्याण मंत्रालयाच्या आरोग्यसेवा महासंचालनालयाने १७ ऑक्टोबर २०२६ रोजी स्थापन केलेल्या तज्ज्ञ समितीच्या शिफारशींच्या आधारे हा निर्णय घेण्यात आला.
६७९ औषध ब्रँडच्या किमतीत ५० टक्क्यांपेक्षा जास्त घट
८ नोव्हेंबर २०२६ पर्यंत ८५ औषधनिर्मिती कंपन्यांनी १२१ औषधांशी संबंधित कर्करोगावरील १,३६४ औषधांच्या विविध स्वरूपांच्या सुधारित कमाल किरकोळ किमती जाहीर केल्या आहेत. यामध्ये ६७९ ब्रँडच्या किमतीत ५० टक्क्यांपेक्षा अधिक कपात झाली आहे.
किमतीतील सर्वाधिक घट ९६.४५ टक्के इतकी नोंदवण्यात आली आहे. या दरकपातीमुळे औषधे खरेदी करणाऱ्या ग्राहकांची वर्षाला अंदाजे ३,५४०.३८ कोटी रुपयांची बचत होईल, असा अंदाज व्यक्त करण्यात आला आहे.
औषधांच्या नव्या किमती कशा तपासाल?
औषधांच्या पाकिटावर छापलेली सुधारित कमाल किरकोळ किंमत तपासून ग्राहकांना आकारण्यात येणारा दर पडताळता येईल. याशिवाय एनपीपीएचे ‘फार्मा सही दाम’ हे भ्रमणध्वनीवरील अनुप्रयोग किंवा प्राधिकरणाचे अधिकृत संकेतस्थळ nppa.gov.in यांच्यामार्फतही औषधांच्या किमतींची माहिती मिळवता येईल.
नव्या दरांची अंमलबजावणी झाल्यानंतर औषध विक्रेते किंवा रुग्णालयांतील औषधालयांना सुधारित कमाल किरकोळ किमतीपेक्षा अधिक रक्कम आकारता येणार नाही. त्यामुळे औषध खरेदी करताना बिलावरील रक्कम आणि पाकिटावर नमूद केलेला दर यांची तपासणी करणे ग्राहकांसाठी महत्त्वाचे ठरणार आहे.
जादा पैसे आकारल्यास तक्रार कुठे कराल?
एखाद्या औषध विक्रेत्याने किंवा रुग्णालयातील औषधालयाने सुधारित दरापेक्षा अधिक पैसे घेतल्यास ग्राहकांना एनपीपीएकडे तक्रार करता येईल. यासाठी ‘फार्मा जन समाधान’ या तक्रार निवारण पोर्टलचा वापर करता येतो. तसेच १८००-१११-२५५ या हेल्पलाइन क्रमांकावर संपर्क साधण्याची सुविधाही उपलब्ध आहे.
कर्करोगाच्या उपचारांमध्ये औषधांचा खर्च हा रुग्ण आणि त्यांच्या कुटुंबीयांसाठी मोठा आर्थिक भार ठरतो. त्यामुळे सुधारित दरांचा प्रत्यक्ष लाभ रुग्णांपर्यंत पोहोचतो का, तसेच औषध विक्री केंद्रांकडून त्यांची काटेकोर अंमलबजावणी होते का, याकडे लक्ष राहणार आहे.
