राज्यातील सर्व शाळा सुरू राहणार; शाळा बंद आंदोलनाच्या पार्श्वभूमीवर शिक्षण संचालकांचे स्पष्ट निर्देश
मुंबई, दि. ८ : राज्यात ९ जुलै २०२६ रोजी प्रस्तावित शाळा बंद आंदोलनाच्या पार्श्वभूमीवर माध्यमिक व उच्च माध्यमिक शिक्षण संचालनालयाने महत्त्वपूर्ण निर्देश जारी केले आहेत. विद्यार्थ्यांच्या शैक्षणिक हिताला सर्वोच्च प्राधान्य देत राज्यातील कोणतीही शाळा बंद राहू नये, असे स्पष्ट आदेश देण्यात आले असून, आंदोलनाच्या दिवशी शाळा बंद ठेवल्यास संबंधित मुख्याध्यापक, शिक्षक आणि शिक्षकेतर कर्मचाऱ्यांवर एका दिवसाच्या वेतन कपातीची कारवाई करण्यात येणार असल्याचे माध्यमिक व उच्च माध्यमिक शिक्षण संचालक डॉ. महेश पालकर यांनी स्पष्ट केले आहे.
राज्यातील विविध माध्यमांमधून प्रसिद्ध झालेल्या वृत्तानुसार, खासगी अनुदानित, अंशतः अनुदानित तसेच विनाअनुदानित शाळांमधील मुख्याध्यापक, शिक्षक आणि शिक्षकेतर कर्मचारी आपल्या विविध प्रलंबित मागण्यांसाठी ९ जुलै रोजी शाळा बंद आंदोलनात सहभागी होणार असल्याची माहिती समोर आली होती. या पार्श्वभूमीवर शिक्षण विभागाने तातडीने परिस्थितीचा आढावा घेत आवश्यक प्रशासकीय उपाययोजना सुरू केल्या आहेत.
यासंदर्भात माध्यमिक व उच्च माध्यमिक शिक्षण संचालकांनी राज्यातील सर्व विभागीय शिक्षण उपसंचालक, जिल्हा परिषदांचे शिक्षणाधिकारी (माध्यमिक) तसेच बृहन्मुंबईतील शिक्षण निरीक्षकांना सविस्तर सूचना जारी केल्या आहेत. या सूचनांनुसार, विद्यार्थ्यांच्या नियमित अध्यापनात कोणत्याही प्रकारचा अडथळा निर्माण होऊ नये यासाठी प्रत्येक शाळा नियमानुसार सुरू ठेवण्याची जबाबदारी संबंधित अधिकाऱ्यांवर सोपविण्यात आली आहे.
माध्यमिक व उच्च माध्यमिक शिक्षण संचालक डॉ. महेश पालकर यांनी स्पष्ट निर्देश देताना म्हटले आहे की, “९ जुलै २०२६ रोजी प्रस्तावित शाळा बंद आंदोलनाच्या पार्श्वभूमीवर राज्यातील कोणतीही शाळा बंद राहणार नसल्याचे स्पष्ट करत विद्यार्थ्यांच्या शैक्षणिक हिताला प्राधान्य देण्याचे निर्देश देण्यात आले आहेत. तसेच आंदोलनाच्या दिवशी शाळा बंद ठेवल्यास संबंधित मुख्याध्यापक, शिक्षक व शिक्षकेतर कर्मचाऱ्यांवर एका दिवसाच्या वेतन कपातीची कारवाई करण्यात येणार आहे.”
शिक्षण विभागाने सर्व संबंधित अधिकाऱ्यांना शाळांच्या कामकाजावर बारकाईने लक्ष ठेवण्याचे निर्देश दिले असून, कोणतीही शाळा विनाकारण बंद राहणार नाही याची दक्षता घेण्यास सांगितले आहे. शासनाच्या आदेशांचे पालन करून विद्यार्थ्यांचे नियमित अध्यापन सुरू ठेवण्यावर विशेष भर देण्यात आला आहे.
यासोबतच, सर्व शाळा व्यवस्थापनांनी शासनाच्या सूचनांचे काटेकोर पालन करावे आणि विद्यार्थ्यांच्या शैक्षणिक हिताला बाधा पोहोचणार नाही याची खबरदारी घ्यावी, असे आवाहन शिक्षण विभागाने केले आहे. शैक्षणिक सत्र सुरळीत सुरू राहावे आणि विद्यार्थ्यांचे कोणतेही शैक्षणिक नुकसान होऊ नये, यासाठी राज्य शासन परिस्थितीवर सातत्याने लक्ष ठेवून असल्याचेही स्पष्ट करण्यात आले आहे.
