पंतप्रधान व केंद्र सरकारवर संजय राऊत यांची जोरदार टीका; परराष्ट्र धोरण, गॅस टंचाई आणि निवडणूक आयोगावरही सवाल
मुंबई, दि. १५ : शिवसेना ठाकरे गटाचे खासदार संजय राऊत यांनी पंतप्रधान नरेंद्र मोदी आणि केंद्र सरकारवर विविध मुद्द्यांवरून तीव्र टीका केली आहे. परराष्ट्र धोरण, देशातील इंधन आणि गॅस टंचाई, निवडणूक आयोगाची भूमिका तसेच लडाखमधील आंदोलन अशा अनेक विषयांवर राऊत यांनी सरकारला लक्ष्य केले. माध्यमांशी बोलताना त्यांनी पंतप्रधानांच्या परराष्ट्र धोरणावर प्रश्न उपस्थित केले आणि आंतरराष्ट्रीय घडामोडींवरही भाष्य केले.
परराष्ट्र धोरणावर टीका
परराष्ट्र धोरणाबाबत बोलताना संजय राऊत म्हणाले, “नरेंद्र मोदींनी देशाची बदनामी करणे आता थांबवायला हवे. संघर्ष थांबवण्याची क्षमता जर मोदींकडे असती, तर इराण आणि इस्रायलमध्ये हजारो निष्पाप लोकांचे प्राण गेले नसते.” या संघर्षाला डोनाल्ड ट्रम्प जबाबदार असल्याचा आरोप करत त्यांनी पुढे म्हटले, “प्रेसिडेंट ट्रम्प यांच्या दबावामुळेच मोदींनी ‘ऑपरेशन सिंदूर’ अचानक मागे घेतले. आम्ही कोणाकडून तेल खरेदी करायचे, याची परवानगी आता ट्रम्प देत आहेत, हा भारताचा अपमान आहे.”
गॅस टंचाईवरून सरकारवर निशाणा
देशातील इंधन आणि एलपीजी गॅस टंचाईबाबतही राऊत यांनी केंद्र सरकारवर टीका केली. त्यांनी शिर्डी साईबाबा संस्थानचे उदाहरण देत परिस्थिती गंभीर असल्याचे सांगितले. ते म्हणाले, “देशात एलपीजी गॅससाठी रांगा लागल्या आहेत. इंधन आणि गॅस नसल्यामुळे शिर्डीत प्रसादाचे दोन ऐवजी आता एकच लाडू दिला जात आहे. जेवणात दोन चपात्यांऐवजी एकच चपाती दिली जात आहे.” मुंबईतील परिस्थितीवर बोलताना त्यांनी दावा केला की, “मुंबईतील ४० टक्के रेस्टॉरंट्स बंद झाली असून हजारो लोकांचा रोजगार गेला आहे. ही देशाच्या पंतप्रधानांची मोठी बदनामी आहे.”
सोनम वांगचुक प्रकरणावर सरकारला प्रश्न
लडाखमधील पर्यावरण कार्यकर्ते आणि शिक्षणतज्ज्ञ सोनम वांगचुक यांच्या अटकेच्या मुद्द्यावरूनही संजय राऊत यांनी सरकारवर टीका केली. ते म्हणाले, “ज्या शिक्षण तज्ज्ञाचे मॉडेल जगाने मान्य केले, तो जेव्हा सरकारला प्रश्न विचारतो तेव्हा तो तुमच्यासाठी राष्ट्रद्रोही ठरतो. देशातले सगळे गुंड आणि राष्ट्रद्रोही भाजपने आपल्या पक्षात घेऊन शुद्ध केले आहेत.”
निवडणूक आयोगावर अविश्वास
निवडणूक प्रक्रियेबाबत बोलताना राऊत यांनी भारतीय निवडणूक आयोग यांच्यावरही गंभीर आरोप केले. ते म्हणाले, “निवडणूक आयोग ही भारतीय जनता पक्षाची एक ‘एक्स्टेंडेड ब्रँच’ (विस्तारित शाखा) म्हणून काम करत आहे. आयोगाने आपली पत्रकार परिषद भाजपच्या कार्यालयातच घ्यायला हवी. देशाचा त्यांच्यावर विश्वास उरलेला नाही.”
प्रोटोकॉल आणि राष्ट्रपतींचा उल्लेख
पंतप्रधानांच्या प्रोटोकॉलविषयी बोलताना राऊत यांनी राष्ट्रपतींच्या संदर्भानेही सरकारवर टीका केली. ते म्हणाले, “मोदींनी प्रोटोकॉलच्या गप्पा मारू नयेत. नवीन संसद भवन आणि राम मंदिराच्या उद्घाटनाला तुम्ही राष्ट्रपती द्रौपदी मुर्मू यांना बोलावले नाही. गेल्या १०-१२ वर्षांपासून देशात फक्त एकाच व्यक्तीला प्रोटोकॉल मिळतो, बाकी सगळे त्यांचे गुलाम आहेत.”
संजय राऊत यांच्या या वक्तव्यांमुळे राज्यातील तसेच राष्ट्रीय पातळीवरील राजकीय वातावरण पुन्हा तापण्याची शक्यता व्यक्त केली जात आहे. विरोधी पक्षांकडून केंद्र सरकारच्या धोरणांवर सातत्याने टीका होत असताना सत्ताधारी पक्षाकडून त्याला कशा प्रकारे उत्तर दिले जाते, याकडे आता राजकीय वर्तुळाचे लक्ष लागले आहे.
