नवी मुंबईत २६ ठिकाणी हिवताप/डेंग्यू विषयक जनजागृती शिबीरांना नागरिकांचा चांगला प्रतिसाद

नवी मुंबई, दि. २८: नवी मुंबई महानगरपालिका कार्यक्षेत्रामध्ये हिवताप/डेंग्‍यू आजाराचा प्रसार रोखण्यासाठी महापालिका आयुक्त डॉ. कैलास शिंदे यांच्या मार्गदर्शनाखाली २६ नागरी प्राथमिक आरोग्य केंद्रांच्या क्षेत्रात आयोजित जनजागृतीपर विशेष आरोग्य शिबीरांना चांगला प्रतिसाद मिळत आहे. आज २६ ठिकाणी आयोजित शिबिरांना १३५३३ नागरिकांनी भेट दिली असून १३१२ रक्त नमुने घेण्यात आले आहेत.

या शिबिरांच्या ठिकाणी ॲनॉफीलीस व एडीस डासांची उत्पत्तीस्थाने प्रत्यक्षात मॉडलव्दारे दाखवून, तसेच नागरिकांना डासांच्या अळ्या प्रत्यक्ष दाखवून, घराभोवती व घरांतर्गत असणारी संभाव्य डासोत्पत्ती स्थाने दाखविण्यात आली. यामध्ये पाणी साठवून ठेवलेले ड्रम ओढणी, धोतर किंवा साडीच्या कपड्याने बंदिस्त करणे, त्याचप्रमाणे पाणी साठविण्याची भांडी व टाक्या बंदिस्त करणे व आठवड्यातून एक दिवस स्वच्छ करुन कोरड्या ठेवणे, भंगार साहित्य व टायर्स इ. नष्ट करणे, छतावरील प्लास्टीक शीट, ताडपत्री यामध्ये पाणी साचू न देणे, ताप येताच त्वरित डॉक्टरांचा सल्ला घेणे याविषयी मार्गदर्शन करण्यात आले तसेच याप्रमाणे अंमलबजावणी करण्याचे आवाहन करण्यात आले.

नवी मुंबई महानगरपालिका कार्यक्षेत्राची भौगोलिक रचना लक्षात घेता नागरी वस्तीलगत असणारा खाडी किनारा व त्याठिकाणचा दलदलीचा परिसर यामध्ये हिवाळा कालावधीत क्युलेक्स डासांची घनता वाढण्याकरिता पोषक वातावरण असल्याने या कालावधीत इतर कालावधीपेक्षा जास्त डास प्रादुर्भाव जाणवतो. परिणामी सदर कार्याक्षेत्रालगतच्या नागरी वस्तीमधून डास प्रादुर्भावाच्या तक्रारी मोठ्या प्रमाणात प्राप्त होत असतात. यामुळे दि. २५/११/२०२४ ते २२/०२/२०२५ या कालावधीत नागरिकांना डासांचा जास्त त्रास जाणवू नये या उद्देशाने आयुक्त महोदयांच्या निर्देशानुसार डासांचा प्रादुर्भाव कमी करण्यासाठी सकाळच्या नियमित धुरीकरणासोबत सायंकालीन धुरीकरण सुरु करण्यात आले आहे.

सकाळचे धुरीकरण हे साप्ताहिक वेळापत्रानुसार नियोजित कार्यक्षेत्रामधील बंद गटारांमध्ये केले जाते तर सायंकालीन धुरीकरण गावठाण, झोपडपट्टी व सोसायटी अंतर्गत मीटर रुम, जिने या ठिकाणी पंधरवडा कार्यक्रमानुसार राबविले जाते. अशाप्रकारची शिबिरे ऑगस्ट पासून सातत्याने राबविण्यात येत असून त्यांना नागरिकांचा चांगला प्रतिसाद लाभलेला आहे.

या कालावधीत एकूण २९० जाहीर शिबीरांचे आयोजन करण्यात आले असून या शिबिरांचा लाभ १,२८,६८८ नागरिकांनी घेतला आहे या शिबिरांमध्ये ११६४४ रक्त नमुने घेण्यात आले आहेत. तरी आरोग्य विभागाच्या कार्यवाहीसोबतच नवी मुंबईकर नागरिकांनी आपल्या घरातील व घराभोवतालची डासउत्पत्ती स्थाने नष्ट करणे तसेच आपले घर व परिसर स्वच्छ ठेवावे, घरातील डासोत्पत्ती स्थाने नष्ट करावीत, आजुबाजूचा परिसर/टेरेसवरील भंगार नष्ट करावे, जेणेकरुन नवी मुंबईत हिवताप/डेंग्यू आजारांवर आळा घालणे शक्य होईल, असे आवाहन महापालिका आयुक्त डॉ. कैलास शिंदे यांनी केले आहे.