पंतप्रधान नरेंद्र मोदी यांच्या हस्ते २४ व्या हप्त्याचे वितरण; उपमुख्यमंत्री सुनेत्रा अजित पवार यांची पुण्यातून दूरदृश्य प्रणालीद्वारे उपस्थिती
पुणे, दि. ३१ : शेतीसाठी आर्थिक हातभार लावणाऱ्या प्रधानमंत्री किसान सन्मान निधी योजनेतून पुणे जिल्ह्यातील शेतकऱ्यांना आतापर्यंत १ हजार ९३७ कोटी रुपयांची मदत मिळाली आहे. जिल्ह्यातील १३ तालुक्यांमध्ये नोंदणी केलेल्या ५ लाख ७६ हजार २७९ शेतकऱ्यांपैकी सध्या सुमारे ४ लाख ३४ हजार ३२७ शेतकरी या योजनेच्या लाभासाठी पात्र आहेत. योजनेच्या २४ व्या हप्त्याचे वितरण पंतप्रधान नरेंद्र मोदी यांच्या हस्ते गुजरातमधील बनासकांठा येथे झालेल्या कार्यक्रमात करण्यात आले.
या कार्यक्रमाला उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार यांनी पुणे जिल्हाधिकारी कार्यालयातून दूरदृश्य प्रणालीद्वारे सहभाग नोंदवला. यावेळी राज्याचे कृषी आयुक्त सूरज मांढरे, जिल्हाधिकारी जितेंद्र डुडी, कृषी संचालक उदय देशमुख आणि जिल्हा अधीक्षक कृषी अधिकारी वैभव तांबे उपस्थित होते.
वर्षाला सहा हजार रुपयांची मदत
प्रधानमंत्री किसान सन्मान निधी योजनेंतर्गत पात्र शेतकरी कुटुंबांना वर्षभरात एकूण सहा हजार रुपये दिले जातात. ही रक्कम प्रत्येकी दोन हजार रुपयांच्या तीन हप्त्यांमध्ये थेट लाभार्थ्यांच्या बँक खात्यात जमा केली जाते. शेतीच्या हंगामी गरजा, बियाणे, खते आणि अन्य कृषी निविष्ठांच्या खरेदीसाठी शेतकऱ्यांना आर्थिक मदत मिळावी, हा या योजनेचा उद्देश आहे.
२०१९ पासून पुणे जिल्ह्यातील लाभार्थ्यांना २३ हप्त्यांमधून निधी देण्यात आला आहे. आता २४ वा हप्ता वितरित झाल्याने योजनेच्या माध्यमातून मिळणाऱ्या आर्थिक मदतीचे पुढील वितरणही पात्रतेच्या निकषांनुसार केले जाणार आहे.
लाभ सुरू ठेवण्यासाठी ई-केवायसीसह आधार संलग्नता महत्त्वाची
योजनेतील पात्रता कायम राहण्यासाठी शेतकऱ्यांनी आपल्या जमिनीच्या अभिलेखांमधील नोंदी अद्ययावत ठेवणे आवश्यक आहे. त्याचबरोबर ई-केवायसी पूर्ण करणे, बँक खाते आधारशी जोडणे आणि आवश्यक शेतकरी ओळख क्रमांकाची पूर्तता करणे गरजेचे आहे.
योजनेची रक्कम आधार संलग्न बँक खात्यात थेट लाभ हस्तांतरण पद्धतीने जमा केली जाते. त्यामुळे बँक खाते, आधार आणि जमिनीच्या नोंदींमधील माहिती अचूक असणे महत्त्वाचे ठरते. योजनेची अंमलबजावणी करताना महसूल, कृषी आणि ग्रामविकास विभागांमध्ये समन्वय ठेवण्यात येत आहे.
तालुकानिहाय लाभार्थी आणि वितरित निधी
पुणे जिल्ह्यातील तालुकानिहाय आकडेवारीनुसार, आंबेगावमध्ये ३७ हजार २३१ शेतकरी पात्र असून त्यांना १५१ कोटी रुपये मिळाले आहेत. बारामतीतील ५० हजार ७३१ लाभार्थ्यांना २३० कोटी रुपये, तर भोरमधील २५ हजार १३७ लाभार्थ्यांना १०४ कोटी रुपयांचे वितरण झाले आहे.
दौंड तालुक्यात ४२ हजार ४२० लाभार्थ्यांना १९५ कोटी रुपये, हवेलीमध्ये १० हजार ९५३ लाभार्थ्यांना ५६ कोटी रुपये आणि इंदापूरमध्ये ४८ हजार ७४० लाभार्थ्यांना २१९ कोटी रुपये मिळाले आहेत.
जुन्नरमधील ५२ हजार २८१ शेतकऱ्यांना २३१ कोटी रुपये, खेडमधील ४३ हजार ६३३ लाभार्थ्यांना २०० कोटी रुपये, तर मावळमधील १७ हजार ४९६ लाभार्थ्यांना ७७ कोटी रुपये वितरित करण्यात आले आहेत.
मुळशी तालुक्यात १३ हजार ५५ लाभार्थ्यांना ७१ कोटी रुपये, पुरंदरमध्ये ३२ हजार १०८ लाभार्थ्यांना १३३ कोटी रुपये आणि शिरूरमध्ये ५१ हजार ५०८ लाभार्थ्यांना २२९ कोटी रुपये मिळाले आहेत. वेल्हा तालुक्यातील ९ हजार ३४ पात्र शेतकऱ्यांच्या खात्यांमध्ये ४० कोटी रुपये जमा करण्यात आले आहेत.
जिल्ह्यातील तालुकानिहाय आकडेवारीवरून बारामती, जुन्नर आणि शिरूर या तालुक्यांमध्ये लाभार्थ्यांची संख्या तुलनेने अधिक असल्याचे दिसते. एकूण १,९३७ कोटी रुपयांच्या वितरणातून जिल्ह्यातील शेती क्षेत्राला मिळालेला आर्थिक आधार अधोरेखित होतो.
