युतीचा उत्तर महाराष्ट्र मेळावा उद्या नाशिकमध्ये
नाशिक: शिवसेना पक्षप्रमुख उद्धव ठाकरे व मुख्यमंत्री देवेंद्र फडणवीस यांच्या प्रमुख उपस्थितीत रविवारी १७ मार्च रोजी नाशिकमध्ये शिवसेना-भाजपा युतीचा उत्तर महाराष्ट्र मेळावा होणार आहे. उद्या दुपारी ३ वाजता नाशिक येथील चोपडा लॉन्स येथे उत्तर महाराष्ट्रातील युतीचे लोकप्रतिनिधी – पदाधिकारी यांचा संयुक्त मेळावा होणार आहे. या मेळाव्यात शिवसेना पक्षप्रमुख उद्धव ठाकरे व मुख्यमंत्री देवेंद्र फडणवीस हे कार्यकर्त्यांना मार्गदर्शन करतील.
युतीच्या संयुक्त मेळावा पूर्वतयारीसाठी भाजपच्या वसंतस्मृती कार्यालयात युतीचे पदाधिकारी व लोकप्रतिनिधींची बैठक पार पडली. या बैठकीस खासदार हेमंत गोडसे, खासदार हरिश्चंद्र चव्हाण, आमदार देवयानी फरांदे, आमदार सीमा हिरे, आमदार अनिल कदम, आमदार राहुल आहेर, आमदार योगेश घोलप, आमदार राजाभाऊ वाजे, शिवसेना जिल्हाप्रमुख विजय करंजकर, भाजपा प्रदेश प्रवक्ते सुहास फरांदे, महापौर रंजना भानसी, उपमहापौर प्रथमेश गीते, भाजप जिल्हाध्यक्ष दादा जाधव यांच्यासह जिल्ह्यातील शिवसेना – भाजप पक्षांचे नगरसेवक, लोकप्रतिनिधी, पदाधिकारी उपस्थित होते.