‘दुर्मिळातील दुर्मिळ’ गुन्हा ठरवत न्यायालयाचा ऐतिहासिक निर्णय
पुणे, दि. २९ : पुणे जिल्ह्यातील भोर तालुक्यातील नसरापूर येथे महाराष्ट्र दिन अर्थात १ मे रोजी अवघ्या साडेतीन वर्षांच्या चिमुकलीवर लैंगिक अत्याचार करून तिची निर्घृण हत्या करण्यात आल्याच्या अत्यंत संतापजनक प्रकरणात पुणे जिल्हा व सत्र न्यायालयाने आज सोमवार दि. २९ जून रोजी महत्त्वपूर्ण निकाल दिला. विशेष फास्ट ट्रॅक न्यायालयाचे न्यायाधीश एस. आर. साळुंखे यांनी आरोपी भीमराव कांबळे याला दोषी ठरवत फाशीची शिक्षा सुनावली.
निकाल देताना न्यायालयाने हा गुन्हा “दुर्मिळातील दुर्मिळ” स्वरूपाचा असल्याचे स्पष्ट नमूद केले. आरोपीने केलेले कृत्य अमानवी, क्रूर आणि समाजमन हादरवणारे असल्याचे निरीक्षण न्यायालयाने नोंदविले.
न्यायालयाचे महत्त्वपूर्ण निरीक्षण
निकालाचे वाचन करताना विशेष न्यायाधीश एस. आर. साळुंखे यांनी म्हटले की, “आरोपीने तीन वर्षांच्या मुलीसोबत अमानवी कृत्य केलं. त्याला भीती नव्हती. त्याचा पूर्व इतिहास होता. त्याची कल्पना होती की त्याला काही होणार नाही, म्हणून तो ही कृती करायला धजावला.”
न्यायालयाने पुढे नमूद केले की, घटनेच्या वेळी आरोपी पीडित मुलीसोबत होता. मात्र तो तिच्यासोबत का होता, याचे समाधानकारक स्पष्टीकरण आरोपी देऊ शकला नाही. तपास यंत्रणेने परिस्थितीजन्य पुराव्यांची प्रभावी साखळी सिद्ध केली असून सर्व पुरावे आरोपीकडेच निर्देश करतात, असे न्यायालयाने स्पष्ट केले.
‘दुर्मिळातील दुर्मिळ’ प्रकरण
न्यायालयाने सर्वोच्च न्यायालयाने यापूर्वी दिलेल्या विविध निर्णयांचा संदर्भ घेत फाशीच्या शिक्षेबाबतची भूमिका स्पष्ट केली. निकालात नमूद करण्यात आले की, कट रचून, शांत डोक्याने केलेली हत्या, गुन्ह्यातील क्रूरता, बलात्कार, पीडितेची असहाय्यता आणि समाजावर झालेला दूरगामी परिणाम या बाबी फाशीच्या शिक्षेसाठी महत्त्वाच्या ठरतात.
न्यायालयाने स्पष्ट केले की या प्रकरणात आरोपीविरोधातील पुरावे भक्कम आहेत. पीडित मुलगी स्वतःचे संरक्षण करण्याच्या स्थितीत नव्हती. आरोपीने केवळ स्वतःची वासना पूर्ण करण्यासाठी अत्यंत निर्दयीपणे हे कृत्य केले.
आरोपीला माफी देण्यासारखी कोणतीही बाब नाही
न्यायालयाने निरीक्षण नोंदविताना म्हटले, “आरोपीचा वयाच्या व्यतिरिक्त त्याला माफी देण्यालायक काहीही नाही.” तसेच आरोपीचा पूर्वीचा गुन्हेगारी इतिहासही न्यायालयाने विचारात घेतला. यापूर्वीही अल्पवयीन मुलीवर अत्याचाराचा प्रयत्न, एका वृद्ध महिलेवरील हल्ला तसेच अन्य महिलेवर शारीरिक अत्याचाराचा प्रयत्न अशा घटनांचा उल्लेख न्यायालयाने केला.
पोस्टमार्टम व वैद्यकीय पुरावे निर्णायक
निकालात न्यायालयाने नमूद केले की, पोस्टमार्टम अहवालातून पीडितेवर लैंगिक अत्याचार झाल्याचे स्पष्ट झाले आहे. सीसीटीव्ही चित्रीकरण, न्यायवैद्यक पुरावे, वैज्ञानिक तपास आणि इतर परिस्थितीजन्य पुराव्यांमुळे आरोपीच गुन्हेगार असल्याचे संशयातीतरीत्या सिद्ध झाले.
न्यायालयाने अत्यंत गंभीर निरीक्षण नोंदविताना म्हटले की, “आरोपीने चिमुकलीला जिवंत राहण्याचा कोणताही पर्याय दिला नाही. त्याचे कृत्य अमानुष होते.” तसेच या गुन्ह्यामुळे समाजमनावर गंभीर परिणाम झाल्याचेही न्यायालयाने नमूद केले.
जलदगतीने पूर्ण झालेला खटला
या प्रकरणात तपास यंत्रणांनी वेगाने काम करत गुन्ह्यानंतर अवघ्या सोळा दिवसांत आरोपपत्र दाखल केले. त्यानंतर न्यायालयाने दैनंदिन सुनावणी घेत अल्पावधीत खटला पूर्ण केला.
न्यायालयाने नमूद केले की, सोळा दिवसांत आरोपपत्र दाखल करण्यात आले. पंचावन्न साक्षीदारांची साक्ष नोंदविण्यात आली. तपासात वैज्ञानिक, वैद्यकीय, सायबर व न्यायवैद्यक पुराव्यांचा प्रभावी वापर करण्यात आला.
तपास पथकाचे न्यायालयाकडून कौतुक
न्यायालयाने पुणे ग्रामीण पोलिसांच्या तपासाचे विशेष कौतुक केले. तपास अधिकारी, न्यायवैद्यक तज्ज्ञ, सायबर तज्ज्ञ, डॉक्टर तसेच विशेष सरकारी वकील यांनी सचोटीने काम करून अल्पावधीत न्यायप्रक्रिया पूर्ण करण्यास मोठे योगदान दिल्याचे न्यायालयाने नमूद केले.
विशेष सरकारी वकिलांचा युक्तिवाद
विशेष सरकारी वकील अजय मिसर यांनी आरोपीस फाशीची शिक्षा देण्याची मागणी करत सर्वोच्च न्यायालयाच्या बारा महत्त्वाच्या निर्णयांचा आधार न्यायालयासमोर मांडला. गुन्ह्यातील क्रूरता, पीडितेची असहाय्यता, समाजावर झालेला परिणाम आणि हा गुन्हा “दुर्मिळातील दुर्मिळ” स्वरूपाचा असल्याचे त्यांनी न्यायालयाच्या निदर्शनास आणून दिले.
प्रकरणाची पार्श्वभूमी
१ मे रोजी भोर तालुक्यातील नसरापूर येथे अवघ्या साडेतीन वर्षांच्या बालिकेवर लैंगिक अत्याचार करून तिची हत्या करण्यात आली होती. या घटनेनंतर पुणे ग्रामीण पोलिसांनी तातडीने विशेष तपास पथक स्थापन केले.
पोलिस अधीक्षक संदीपसिंग गिल यांच्या मार्गदर्शनाखाली वरिष्ठ पोलिस निरीक्षक विजयमाला पवार यांनी तपासाची सूत्रे हाती घेतली. सीसीटीव्ही चित्रीकरण, न्यायवैद्यक अहवाल, वैद्यकीय पुरावे, प्रत्यक्षदर्शींची साक्ष आणि तांत्रिक पुराव्यांच्या आधारे पोलिसांनी सुमारे एक हजार दोनशे पानांचे आरोपपत्र न्यायालयात दाखल केले.
विशेष न्यायाधीश एस. आर. साळुंखे यांच्या न्यायालयात २१ मे पासून दैनंदिन सुनावणी सुरू झाली आणि जलदगतीने खटला पूर्ण करून अखेर आरोपीला बलात्कार व हत्येप्रकरणी तसेच संबंधित संरक्षण कायद्यांतील तरतुदींनुसार फाशीची शिक्षा सुनावण्यात आली.
