गोव्यातील मद्याची महाराष्ट्रात बेकायदा वाहतूक; ट्रकसह १ कोटी ३० लाख ६० हजार रुपयांचा मुद्देमाल उत्पादन शुल्क विभागाच्या ताब्यात
नवी मुंबई, दि. १२ : नवी मुंबईतील ऐरोली रेल्वेस्थानकाजवळ नियमित वाहतुकीच्या मार्गावरून मद्याची मोठी खेप नेली जात असल्याची माहिती मिळाल्यानंतर राज्य उत्पादन शुल्क विभागाने कारवाई केली. बेलापूर–ठाणे मार्गावर अडवलेल्या बाराचाकी ट्रकमध्ये साबणाऐवजी मद्याच्या पेट्या आढळल्या. तपासणीत गोव्यात निर्मित आणि महाराष्ट्रात विक्रीस बंदी असलेल्या व्हिस्कीच्या ४८ हजार बाटल्या सापडल्या. या प्रकरणी एका तरुणाला अटक करण्यात आली असून, मद्य आणि ट्रक असा एकूण १ कोटी ३० लाख ६० हजार रुपयांचा मुद्देमाल जप्त करण्यात आला आहे.
साबणाच्या पेट्यांचा दावा; तपासणीत मद्याचा साठा
बेलापूर–ठाणे मार्गावरून अवैध मद्याची वाहतूक होणार असल्याची माहिती कोकण विभागीय भरारी पथकाला मिळाली होती. त्यानुसार निरीक्षक दिगंबर शेवाळे यांच्या मार्गदर्शनाखाली पथकाने ऐरोली रेल्वेस्थानकासमोर सापळा रचला. यावेळी चॉकलेटी आणि पांढऱ्या रंगाचा टाटा कंपनीचा बाराचाकी ट्रक अडवण्यात आला. या वाहनाचा क्रमांक एमएच-१०-एडब्ल्यू-५२९४ असा आहे.
ट्रकमध्ये साबणाच्या पेट्या असल्याचे चालकाने सांगितले. मात्र, वाहनाची तपासणी केली असता खाकी रंगाच्या मोठ्या प्रमाणातील पेट्या आढळल्या. त्या उघडून पाहिल्यानंतर त्यात मद्याच्या बाटल्या असल्याचे स्पष्ट झाले.
एक हजार पेट्यांमध्ये ४८ हजार बाटल्या
जप्त केलेल्या साठ्यात गोवा राज्यात तयार होणाऱ्या ‘रॉयल ब्ल्यू माल्ट व्हिस्की’च्या १८० मिली क्षमतेच्या बाटल्यांचा समावेश आहे. महाराष्ट्रात या मद्याच्या विक्रीस बंदी असल्याचे उत्पादन शुल्क विभागाने नमूद केले आहे. तसेच बाटल्यांवर बॅच क्रमांक आणि कमाल किरकोळ किंमत नमूद नसल्याचे तपासणीत आढळले.
पथकाने मद्याच्या एकूण एक हजार पेट्या जप्त केल्या. त्यामध्ये ४८ हजार बाटल्या होत्या. मद्यसाठा आणि वाहतुकीसाठी वापरलेला ट्रक यांची एकत्रित किंमत १ कोटी ३० लाख ६० हजार रुपये असल्याचे विभागाकडून सांगण्यात आले.
धुळे जिल्ह्यातील तरुणाला अटक
या प्रकरणी जावेदखान नवाबखान पिंजारी (वय २४) याला अटक करण्यात आली आहे. तो गधडदेव, पोस्ट बोराडी, तालुका शिरपूर, जिल्हा धुळे येथील रहिवासी आहे. आरोपीविरुद्ध महाराष्ट्र दारूबंदी कायदा, १९४९ मधील कलम ६५ (अ), ६५ (ई), ८०, ८१, ८३, ९० आणि १०३ अन्वये गुन्हा दाखल करण्यात आला आहे. या प्रकरणाचा पुढील तपास दुय्यम निरीक्षक एच. बी. यादव करीत आहेत.
राज्य उत्पादन शुल्क आयुक्त डॉ. राजेश देशमुख, सहआयुक्त प्रसाद सुर्वे, कोकण विभागाचे विभागीय उपायुक्त प्रदीप पवार आणि ठाणे-१ चे अधीक्षक प्रवीण तांबे यांच्या निर्देशानुसार ही कारवाई करण्यात आली. निरीक्षक दिगंबर शेवाळे, दुय्यम निरीक्षक एच. बी. यादव आणि व्ही. व्ही. सकपाळ यांच्यासह जवान ए. पी. राठोड, हर्षल खरबस, हनुमंत गाढवे आणि अमोल सानप यांनी या मोहिमेत सहभाग घेतला.
गोव्यातील मद्याची महाराष्ट्रात बेकायदा वाहतूक करण्याचा प्रयत्न उघड झाल्यानंतर आता या साठ्याच्या वाहतुकीमागील साखळी आणि त्याचा पुढील व्यवहार याबाबत तपासातून काय माहिती समोर येते, याकडे लक्ष लागले आहे.
