नाशिक विभागात सर्वाधिक ८२६ पदे; पेसा क्षेत्रासाठी ८८५ तर बिगर-पेसा क्षेत्रासाठी १,५३६ जागा
मुंबई, दि. २० : राज्यातील आदिवासी विद्यार्थ्यांच्या शिक्षणाशी संबंधित शासकीय आश्रमशाळांमधील शिक्षकांची रिक्त पदे भरण्याचा मार्ग मोकळा झाला आहे. आदिवासी विकास विभागाच्या अखत्यारीतील आश्रमशाळांमध्ये प्राथमिक, माध्यमिक आणि उच्च माध्यमिक स्तरावरील २ हजार ४२१ शिक्षकांच्या जागा भरल्या जाणार आहेत. पेसा आणि बिगर-पेसा क्षेत्रांचा स्वतंत्र विचार करून ही भरती ‘पवित्र’ पोर्टलच्या माध्यमातून राबवली जात आहे.
नाशिक, ठाणे, अमरावती आणि नागपूर या चार विभागांतील शासकीय आश्रमशाळांमध्ये ही पदे उपलब्ध आहेत. विभागनिहाय विचार केला तर नाशिकमध्ये ८२६, ठाणे विभागात ६१३, नागपूरमध्ये ५१४ आणि अमरावती विभागात ४६८ पदे भरली जाणार आहेत.
या भरतीत प्राथमिक शिक्षक, माध्यमिक शिक्षक तसेच उच्च माध्यमिक शिक्षक अर्थात शिक्षण सेवक या पदांचा समावेश आहे. मराठी आणि इंग्रजी माध्यमातील शिक्षकांसाठी स्वतंत्र जागा निश्चित करण्यात आल्या आहेत.
पेसा आणि बिगर-पेसा क्षेत्रासाठी स्वतंत्र जागा
आश्रमशाळांमधील शिक्षक भरतीमध्ये पेसा क्षेत्रातील ८८५ आणि बिगर-पेसा क्षेत्रातील १ हजार ५३६ पदांचा समावेश आहे. स्थानिक परिस्थिती आणि आदिवासीबहुल क्षेत्रातील गरजा लक्षात घेऊन या दोन्ही क्षेत्रांसाठी स्वतंत्र पदसंख्या निश्चित करण्यात आली आहे.
प्राथमिक शिक्षकांच्या मराठी माध्यमासाठी बिगर-पेसा क्षेत्रात ८६२, तर पेसा क्षेत्रात ४३६ जागा आहेत. इंग्रजी माध्यमातील प्राथमिक शिक्षकांसाठी पेसा क्षेत्रात ६७ आणि बिगर-पेसा क्षेत्रात १६१ पदे उपलब्ध आहेत.
माध्यमिक स्तरावरील मराठी माध्यमाच्या शिक्षकांसाठी बिगर-पेसा क्षेत्रात ३५२, तर पेसा क्षेत्रात १३८ जागा आहेत. इंग्रजी माध्यमासाठी पेसा क्षेत्रात ५ आणि बिगर-पेसा क्षेत्रात २२ पदे निश्चित करण्यात आली आहेत.
उच्च माध्यमिक शिक्षकांच्या एकूण ३५७ जागांपैकी पेसा क्षेत्रात २५१ आणि बिगर-पेसा क्षेत्रात १०६ पदे आहेत. या पदांमध्ये मराठी, इंग्रजी, इतिहास, राज्यशास्त्र, भूगोल, अर्थशास्त्र, गणित, जीवशास्त्र, रसायनशास्त्र आणि भौतिकशास्त्र या विषयांचा समावेश आहे.
गुणवत्तेच्या आधारे निवड; अफवांवर विश्वास न ठेवण्याचे आवाहन
आदिवासी विकास विभागाच्या म्हणण्यानुसार, शिक्षक भरतीची प्रक्रिया ‘पवित्र’ पोर्टलद्वारे नियमांनुसार राबवली जात आहे. त्यामुळे पात्र उमेदवारांना या प्रक्रियेत सहभागी होण्याची संधी मिळणार असून, भरतीबाबत कोणत्याही अनधिकृत माहितीवर किंवा अफवांवर विश्वास ठेवू नये, असे आवाहन आदिवासी विकास विभागाच्या आयुक्त लीना बनसोड यांनी केले आहे.
पेसा आणि बिगर-पेसा क्षेत्रांतील पदांचे विभाजन केल्यामुळे आश्रमशाळांच्या स्थानिक गरजांनुसार शिक्षक उपलब्ध करून देण्याचा प्रयत्न या भरतीत करण्यात आला आहे. एकाच वेळी चार विभागांमध्ये मोठ्या संख्येने पदे भरली जाणार असल्याने पात्र शिक्षक उमेदवारांसाठी ही भरती महत्त्वाची ठरणार आहे.
एकूण २ हजार ४२१ पदांची शंभर टक्के भरती करण्याचे उद्दिष्ट ठेवण्यात आले असून, पारदर्शक आणि गुणवत्ताधारित प्रक्रियेतून शिक्षकांची निवड करण्यावर भर देण्यात आला आहे. त्यामुळे इच्छुक उमेदवारांनी अधिकृत प्रक्रियेची माहिती घेऊनच अर्ज व पुढील कार्यवाही करणे अपेक्षित आहे.
