छत्रपती शिवाजी महाराज जयंतीनिमित्त नवी मुंबई महानगरपालिकेच्या वतीने अभिवादनासह विविध सांस्कृतिक कार्यक्रमांचे आयोजन

नवी मुंबई, दि. १९: महाराष्ट्राचे आराध्य दैवत छत्रपती शिवाजी महाराज यांच्या जयंती उत्सवानिमित्त नवी मुंबई महानगरपालिकेच्या वतीने विविध कार्यक्रमांचे आयोजन करण्यात आले. सकाळी ९ वाजता वाशी येथील मध्यवर्ती छत्रपती शिवाजी महाराज चौकात महापालिका आयुक्त तथा प्रशासक राजेश नार्वेकर यांच्या शुभहस्ते छत्रपती शिवरायांच्या अश्वारूढ पुतळ्याला पुष्पमालिका अर्पण करण्यात आली. याप्रसंगी अतिरिक्त आयुक्त सुजाता ढोले, माजी खासदार संजीव नाईक, माजी आमदार संदीप नाईक, शहर अभियंता संजय देसाई, प्रशासन विभागाचे उपआयुक्त शरद पवार, परिमंडळ १ विभागाचे नमुंमपा उपायुक्त सोमनाथ पोटरे, घनकचरा व्यवस्थापन विभागाचे उपआयुक्त डॉ. बाबासाहेब राजळे, भांडार विभागाच्या उपआयुक्त मंगला माळवे, वाशी विभागाचे सहाय्यक आयुक्त सागर मोरे, कार्यकारी अभियंता अजय संख्ये व अरविंद शिंदे आणि इतर मान्यवर उपस्थित होते.

याप्रसंगी महाराष्ट्र शासनाने अंगीकृत केलेल्या ‘जय जय महाराष्ट्र माझा’ या कविवर्य राजा बढे लिखित ‘राज्यगीताचे’ छत्रपती शिवाजी महाराज चौकात मोठ्या संख्येने उपस्थित जनसमुदायासह समुहगान करण्यात आले. यावेळी चौकामध्ये उपस्थित असलेल्या नागरिकांनीही आहे त्याच ठिकाणी स्तब्ध राहून राज्यगीताचा बहुमान राखला. रंगावलीकार श्रीहरी पवळे यांनी छत्रपती शिवाजी महाराज चौकात रेखाटलेली रांगोळी लक्षवेधी होती. अनेकजणांनी रांगोळीसमवेत सेल्फी काढल्या. सनईचौघडा आणि तुतारी वादनामुळे या सोहळ्याला पारंपारिक साज चढविला.

अशाच प्रकारे नवी मुंबई महानगरपालिकेच्या मुख्यालयातील अॅम्फिथिएटर येथे छत्रपती शिवाजी महाराज यांच्या प्रतिमेला तसेच पाचव्या मजल्यावरील राजमाता जिजाऊ सभागृहाच्या प्रवेशव्दाराजवळ असलेल्या छत्रपती शिवाजी महाराज आणि राजमाता जिजाऊ यांच्या पुतळ्याला पुष्पमालिका अर्पण करून अभिवादन करण्यात आले. याप्रसंगी अतिरिक्त आयुक्त सुजाता ढोले, शहर अभियंता संजय देसाई, प्रशासन विभागाचे उपआयुक्त शरद पवार, परिमंडळ १ विभागाचे नमुंमपा उपायुक्त सोमनाथ पोटरे, परिमंडळ २ विभागाचे उपआयुक्त डॉ. श्रीराम पवार, घनकचरा व्यवस्थापन विभागाचे उपआयुक्त डॉ. बाबासाहेब राजळे, भांडार विभागाच्या उपआयुक्त मंगला माळवे, वैदयकिय आरोग्य अधिकारी डॉ. प्रशांत जवादे, सहा.संचालक नगररचना सोमनाथ केकाण, कार्यकारी अभियंता अजय संख्ये, अरविंद शिंदे, संजय खताळ, संजीव पाटील आणि इतर अधिकारी, कर्मचारी तसेच शालेय विद्यार्थी, शिक्षक व पालक मोठ्या संख्येने उपस्थित होते. याप्रसंगीही महाराष्ट्राच्या राज्यगीताचे समूह गायन करण्यात आले.

शिवजयंती सोहळ्याचे औचित्य साधून ॲम्फिथिएटर येथे छत्रपती शिवाजी महाराज यांच्या प्रतिमापूजनानंतर शालेय विद्यार्थी व शिक्षकांनी सांस्कृतिक कार्यक्रम सादर करीत शिवरायांना गीतनृत्यमय आदरांजली अर्पण केली. यामध्ये सुरूवातीलाच नेरुळ येथील विदयाभवन शाळेत इयत्ता तिसरीमध्ये शिकणा-या काव्या कातळे या छोट्या मुलीने शिवचरित्रातील उल्लेखनीय प्रसंग सांगत प्रेरणादायी भाषण केले व उपस्थितांची दाद मिळवली. नवी मुंबई महानगरपालिकेच्या बेलापूर शाळेतील शिक्षक विकास नाईक यांनी ‘शूर आम्ही सरदार आम्हाला काय कुणाची भीती’ हे लोकप्रिय शौर्यगीत दमदार आवाजात सादर करुन वीररसाचा प्रत्यय दिला. त्याचप्रमाणे नमुंमपा शाळा क्रमांक १०१ शिरवणे येथील २० विदयार्थ्यांच्या समुहाने ‘शिवराज्याभिषेक सोहळा’ सादर करुन शिवकाळ रंगमंचावर अवतीर्ण केला. शालेय विदयार्थ्यांनी त्यांच्या मनात असलेला शिवरायांचा आदरभाव गीतनृत्य स्वरुपात सादर करुन शिवप्रभूंना आगळ्या वेगळ्या पध्दतीने मानवंदना अर्पण केली.