नागपूर मनपा आयुक्त डॉ. अभिजीत चौधरी यांनी केली अंबाझरी तलाव येथील कामाची पाहणी
पावसाळ्यात कुठलिही आपत्कालीन परिस्थिती निर्माण होऊ नये तसेच अंबाझरी तलावातील ओव्हरफ्लो वरील पाण्याचा लवकर निचरा व्हावा याकरिता सिंचन विभागाद्वारे कार्य सुरु करण्यात आले आहे. याशिवाय तलावाच्या मातीच्या बंधाऱ्याचे बळकटीकरण सुरु असून या सर्व कामांची मनपा आयुक्तांनी आज पाहणी केली. मान्सूनपूर्वी सर्व आवश्यक कामे पूर्ण होतील याकडे कटाक्षाने लक्ष देण्याचे निर्देश मनपा आयुक्त तथा प्रशासक डॉ. अभिजीत चौधरी यांनी यावेळी दिले.
नाग नदीच्या पात्रावर अंबाझरी ते क्रेझी केसल मार्गावरील पुलाचे सार्वजनिक बांधकाम विभागाद्वारे काम केले जाणार आहे. या पुलाच्या कार्याचा देखील यावेळी डॉ. चौधरी यांनी आढावा घेतला. उच्च न्यायालयाच्या निर्देशानुसार आवश्यक सर्व काळजी घेऊन तलावाचे बळकटीकरण, मजबुतीकरण आणि ओव्हरफ्लो वरील पाण्याचा सुरळीत विसर्ग होण्याबाबत कार्य करण्याचे निर्देश मनपा आयुक्त तथा प्रशासक डॉ. अभिजीत चौधरी यांनी दिले.
