राऊत यांच्या वकिलांनी अद्याप आरोपपत्राची प्रत मिळाली नसल्याकडे वेधले न्यायालयाचे लक्ष
मुंबई, दि. १९ : पत्रा चाळ प्रकरणी शिवसेना नेते संजय राऊत यांच्यावर दाखल करण्यात आलेल्या आरोपपत्राची आज न्यायालयाने दखल घेतली. संजय राऊत यांच्या वकिलाने न्यायालयाला सांगितले की, त्यांना अद्याप आरोपपत्राची प्रत मिळालेली नाही. त्याबाबत न्यायालयाने ईडी अधिकार्यांना आरोपपत्राची प्रत देण्यास सांगितले. न्यायालयाच्या आदेशानंतर ईडीच्या अधिकाऱ्याने आज आरोपपत्राची प्रत देणार असल्याचे सांगितले.
कोठडीत १४ दिवसांची वाढ
ईडीच्या कार्यपद्धतीवर ताशेरे ओढत न्यायालयाने म्हटले की, ईडीच्या अधिकाऱ्यांचे काय चालले आहे. जोपर्यंत तुम्ही आरोपपत्र देत नाही, तोपर्यंत संजय राऊत यांची कोठडी आणखी १४ दिवस वाढवण्यात आली आहे, असे न्यायालयाने म्हटले आहे. पत्राचाळ गृहनिर्माण पुनर्विकास प्रकल्पातील कथित अनियमिततेशी संबंधित मनी लॉन्ड्रिंग प्रकरणात ईडीने संजय राऊत यांना अटक केली होती. शिवसेना नेते संजय राऊत यांनी महिन्याच्या सुरुवातीला पीएमएलएशी संबंधित खटल्यांच्या सुनावणीसाठी विशेष न्यायालयात अर्ज दाखल केला होता. या अर्जात संजय राऊत यांनी म्हटले होते की, राजकीय सूडबुद्धीने त्यांच्यावर गुन्हा दाखल करण्यात आला आहे. सत्ताधारी पक्षाला विरोध केल्याने आपला छळ करण्यात आल्याचे संजय राऊत यांनी जामीन अर्जात म्हटले आहे.
