पक्षाच्या २५ व्या वर्धापन दिनानिमित्त आयोजित कार्यक्रमात अध्यक्ष शरद पवार यांनी केली घोषणा
मुंबई/नवी दिल्ली, दि. १०: पक्षाच्या २५ व्या वर्धापन दिनानिमित्त आयोजित कार्यक्रमात राष्ट्रवादी काँग्रेसचे अध्यक्ष शरद पवार यांनी सुप्रिया सुळे आणि प्रफुल्ल पटेल यांची पक्षाच्या कार्याध्यक्ष पदी नियुक्ती करत असल्याची घोषणा केली. राष्ट्रवादीचे प्रमुख नेते अजित पवार यांच्या उपस्थितीत ही घोषणा करण्यात आली. गेल्या महिन्यात पवार यांनी पक्षाच्या अध्यक्षपदाचा राजीनामा देण्याची ऑफर दिल्यानंतर पक्षाच्या सदस्यांनी तसेच इतर राजकीय नेत्यांकडून जोरदार निदर्शने करण्यात आली. पवार यांच्या प्रस्तावावर चर्चा करण्यासाठी स्थापन करण्यात आलेल्या राष्ट्रवादीच्या पॅनेलने ५ मे रोजी त्यांचा राजीनामा फेटाळून लावला होता आणि त्यांना पक्षाध्यक्षपदी कायम राहण्याची विनंती केली होती. शरद पवार यांनी पीए संगमा यांच्या साथीने १९९९ मध्ये राष्ट्रवादी कॉंग्रेस पक्षाची स्थापना केली होती.
पक्षाच्या वर्धापन दिनाच्या कार्यक्रमात बोलताना पवार म्हणाले, “सर्व विरोधी पक्षांना एकत्र यावे लागेल, मला खात्री आहे की या देशातील जनता आम्हाला सहकार्य करेल. २३ तारखेला आपण सर्वजण बिहारमध्ये भेटणार आहोत, चर्चा करू आणि एक कार्यक्रम घेऊन येऊ. देशभरात फिरून आपण लोकांसमोर मांडणार आहोत.”
राष्ट्रवादीचे नेते छगन भुजबळ म्हणाले, “निवडणुकीचे काम आणि राज्यसभा आणि लोकसभेचे कामकाज विभागले जावे यासाठी त्यांना कार्याध्यक्ष बनवण्यात आले आहे. निवडणुका जवळ आल्याने त्यांच्या खांद्यावर अधिक जबाबदाऱ्या टाकण्यात आल्या आहेत. २०२४ च्या लोकसभा निवडणुका हाताळण्यासाठी ही जबाबदारी आहे. “
