“अत्याधुनिक तंत्रज्ञानामुळे आशिया आणि आफ्रिकेत दहशतवादाचा धोका वाढत चालला आहे” – डॉ. एस. जयशंकर
मुंबई : अत्याधुनिक तंत्रज्ञानामुळे आशिया आणि आफ्रिकेत दहशतवादाचा धोका वाढत चालला आहे. यामुळे सुरक्षा व्यवस्थांसमोरही नवीन आव्हानं उभी रहात असल्याचं मत परराष्ट्रमंत्री डॉ. एस. जयशंकर यांनी नवी दिल्लीत आयोजित संयुक्त राष्ट्र सुरक्षा परिषदेत आज व्यक्त केलं.
‘अत्याधुनिक तंत्रज्ञानाचा दहशतवादी कारवायांसाठी होणारा उपयोग’ या विषयावर ते बोलत होते. दहशतवादाचं मोठं संकट मानवतेवर आहे. आभासी खासगी यंत्रणा, आभासी चलन, सांकेतिक संदेश यासारख्या अत्याधुनिक तंत्रज्ञानाचा गैरवापर दहशतवादासाठी केला जात आहे. यामुळे सरकार आणि संबंधित यंत्रणांसमोर मोठं आव्हान निर्माण झाल्याबद्दल जयशंकर यांनी यावेळी चिंता व्यक्त केली.
तसंच दहशतवादी संघटना मानवविरहीत ड्रोनचा वापर दहशतवादी कारवायांसाठी होत असल्यानं सुरक्षा यंंत्रणांना धोका निर्माण झाला आहे. ड्रोनच्या मदतीनं दहशतवादी हल्ले, ड्रग्जची तस्करी केली जात असल्याकडेही जयशंकर यांनी लक्ष वेधलं. दहशतवादी संघटना ड्रोनच्या मदतीनं आफ्रिकेतील सुरक्षा बल आणि संयुक्त राष्ट्र शांती सैनिकांच्या हालचालींवर लक्ष ठेवत असल्याचंही त्यांनी सांगितलं.
संयुक्त राष्ट्र सुरक्षा परिषदेचा भारत अध्यक्ष असून या कार्यकाळात दहशतवाद विरोधी मोहिमेला प्राधान्य दिलं जात आहे. सुरक्षा परिषदेतर्फे यासाठी विशेष प्रणाली विकसीत करणार असल्याचंही डॉ. जयशंकर यांनी यावेळी सांगितलं.
