मुख्यमंत्री एकनाथ शिंदे यांचे निकटवर्तीय आमदार संजय शिरसाट यांची सिडकोच्या अध्यक्षपदी नियुक्ती

मुंबई, दि. १७: गेली अनेक वर्षे रिक्त असलेल्या सिडको महामंडळाला नवीन अध्यक्ष लाभले आहेत. शिवसेना शिंदे गटाचे आमदार संजय शिरसाट यांची शहरे आणि औद्योगिक विकास महामंडळ – सिडको च्या अध्यक्षपदी नियुक्ती करण्यात आली आहे. नगरविकास मंत्री दर्जाच्या या पदाला असलेल्या सर्व सेवा सुविधा शिरसाट यांना उपलब्ध करून देण्याबाबत या निर्णयात सूचित करण्यात आलं आहे. हिंगोलीच्या बाळासाहेब ठाकरे हरिद्रा संशोधन आणि प्रशिक्षण केंद्राच्या अध्यक्षपदी माजी खासदार हेमंत पाटील यांची नियुक्ती करण्यात आलेली आहे. या पदाला मंत्रिपदाचा दर्जा प्रदान करण्यात आला आहे. माजी खासदार आनंदराव अडसुळ यांची अनुसूचित जाती जमाती आयोगाचे अध्यक्ष म्हणून नियुक्ती करण्यात आली आहे. याबाबतचे शासननिर्णय काल निर्गमित झाले. २०१९ साली राज्यात महाविकास आघाडीचे सरकार स्थापन झाल्यावर तत्कालीन सिडको अध्यक्ष आ. प्रशांत ठाकूर यांनी राजीनामा दिल्यापासून हे पद रिक्त होते.

Source – AIR