नागपूर महानगरपालिकेच्या उपद्रव शोध पथकाकडून ८ ठिकाणच्या कारवाईमध्ये ४५ हजार दंड वसूल

नागपूर, दि. ९: स्वच्छ भारत अभियान अंतर्गत नागपूर महानगरपालिकेच्या उपद्रव शोध पथकाने गुरूवारी (ता. ९) ८ प्रतिष्ठानांवर कारवाई करून एकूण ४५ हजार रुपयांचा दंड वसूल केला. मनपा आयुक्त तथा प्रशासक डॉ. अभिजीत चौधरी यांच्या निर्देशानुसार उपद्रव शोध पथक प्रमुख वीरसेन तांबे यांच्या मार्गदर्शनात मनपाच्या उपद्रव शोध पथकाच्या दहाही झोनमधील जवानांनी संयुक्तरित्या ही कारवाई केली आहे.

मनपाच्या धंतोली झोन मधील नरेंद्र नगर येथे बालपांडे इन्फ्रास्ट्रक्चरद्वारे रस्त्यालगत बांधकाम साहित्य टाकल्याप्रकरणी मनपाद्वारे कारवाई करण्यात आली व १० हजार रुपये दंड ठोठावण्यात आला. गांधीबाग झोन पथकाद्वारे गोळीबार चौकातील रोनीत स्वीट्स, सागर स्वीट्स, राजेश स्वीट्स आणि महाकाली स्वीट्स या प्रतिष्ठानांवर प्रतिबंधित प्लास्टिक नियमाच्या उल्लंघनाबाबत कारवाई करण्यात आली. चारही प्रतिष्ठानांकडून प्रत्येकी ५ हजार रुपये दंडासह प्रत्येकी १ किलो प्लास्टिक जप्तीची कारवाई करण्यात आली.

आशीनगर झोन पथकाद्वारे पिवळी नदी येथील इंदोर स्वीट्सवर देखील प्रतिबंधित प्लास्टिक संदर्भात कारवाई करून १ किलो प्लास्टिक जप्त करून ५ हजार रुपये दंड ठोठावण्यात आला. मंगळवारी झोनमधील गिट्टीखदान काटोल रोड मार्गावरील एसपीएल फिटनेस हबद्वारे अवैधरित्या विद्युत खांबांवर बॅनर/होर्डिंग लावून नियमांचे उल्लंघन केल्या प्रकरणी ५ हजार रुपये आणि सदर येथील गोपीनाथ तिवारी यांच्याद्वारे फुटपाथवर पाणी पुरी ठेला लावणेचे प्रकरणी ५ हजार रुपये दंड ठोठावण्यात आला.
शहरातील उपरोक्त ठिकाणी करण्यात आलेल्या ८ ठिकाणच्या कारवाईमधून ४५ हजार रुपये दंड वसूल करण्यात आला.