Breaking News

महाराष्ट्र वार्ता च्या ‘आपली समस्या’ टीम ला ८८५०३०३४६३ वर व्हाट्सअप्प द्वारे संपर्क साधा

मनसे अध्यक्ष राज ठाकरे यांनी केली “लोकनेते दि. बा. पाटील फेलोशिप” ची घोषणा

मनसे अध्यक्ष राज ठाकरे यांनी केली “लोकनेते दि. बा. पाटील फेलोशिप” ची घोषणा

मुंबई (विठ्ठल ममताबादे): कष्टकरी, कामगार, प्रकल्पग्रस्त व आगरी-कोळी बांधवांचे ज्येष्ठ नेते दि. बा. पाटील यांच्या सन्मानार्थ “दि. बा. पाटील फेलोशिप” अर्थात पाठ्यवृत्तीची मनसे प्रमुख राज ठाकरे यांनी घोषणा केली व त्याच्या पोस्टरचे अनावरण केले. या उपक्रमास मनापासून शुभेच्छा देत, या उपक्रमातून महत्त्वाच्या सामाजिक प्रश्नांवर अभ्यास होईल व हा सर्व अभ्यास महाराष्ट्रासमोर यावा अशी सूचना याप्रसंगी राज ठाकरे यांनी संयोजकांना केली. याप्रसंगी या फेलोशिपचे समन्वयक नवी मुंबई मनसे शहर अध्यक्ष गजानन काळे उपस्थित होते. तसेच या वेळी रायगड जिल्हाध्यक्ष अतुल भगत, नवी मुंबई उपशहर अध्यक्ष सविनय म्हात्रे उपस्थित होते. फेलोशिपचे मुख्य समन्वयक आमदार राजू पाटील तब्येतीमुळे उपस्थित राहू शकले नाही.

आदरणीय दि. बा. पाटील साहेबांच्या कार्याला सलाम करण्याहेतू ही फेलोशिप सुरू केल्याचे या प्रकल्पाचे मुख्य समन्वयक आमदार राजू पाटील यांनी प्रसिद्धीपत्रकात म्हटले आहे. स्वर्गीय दि. बा. यांचा वारसा सर्व स्तरातील सर्व समाजातील युवकांपर्यंत विविध माध्यमातून पोहोचविणे हे आम्ही आमचे आद्य कर्तव्य समजतो असे देखील मुख्य समन्वयक राजू पाटील यांनी म्हटले आहे.

मुंबई, नवी मुंबई, ठाणे, पालघर, रायगड, कल्याण येथील शहरी ग्रामीण भागात आगरी-कोळी समाजाच्या प्रश्र्नांबरोबर विविध प्रश्न आ वासून उभे आहेत. त्या प्रश्नांवर अभ्यासपूर्ण संशोधन व्हावे, ते प्रश्न सोडविण्यासाठी समाजातील सर्वच संघटनांना त्याचा लाभ व्हावा व या प्रश्नांच्या अभ्यासाचा दस्तऐवज तयार व्हावा या उद्देशानेच महाराष्ट्र नवनिर्माण सेनेने पुढाकार घेऊन लोकनेते दि. बा. पाटील पाठ्यवृत्ती (फेलोशिप) सुरू करीत असल्याचे आमदार राजू पाटील यांनी प्रसिद्धीपत्रकात म्हटले आहे.

येत्या काही दिवसांत पक्षाचे नेते अनिल शिदोरे, राजू पाटील व तज्ज्ञांची एक समिती पत्रकार परिषदेच्या माध्यमातून या फेलोशिपबाबत सविस्तर माहिती देणार असल्याचे या फेलोशिपचे समन्वयक नवी मुंबई मनसे शहर अध्यक्ष गजानन काळे म्हणाले. तसेच फेलोशिपचे मानधन किती असेल, एकूण किती अर्जदार निवडले जातील, निवड प्रक्रिया काय असेल, अर्ज करायची मुदत काय असेल, फेलोशिपसाठी वयोमर्यादा व फेलोशिपसाठी अर्ज करण्याचे वेळापत्रक याबाबत सर्व माहिती पत्रकार परिषदेमधून देणार असल्याचे व या फेलोशिपबाबत अर्ज करण्यासाठी लवकरच एक संकेतस्थळ देखील कार्यान्वित करणार असल्याचे गजानन काळे यांनी प्रसिद्धीपत्रकात म्हटले आहे.

लोकनेते दि. बा. पाटील यांच्यावर असलेले प्रेम व त्यांच्या कार्याप्रती असलेला आदर व्यक्त करण्यासाठी महाराष्ट्र नवनिर्माण सेनेने केलेला हा प्रयत्न असल्याचे मनसेने प्रसिद्धीपत्रकात म्हटले आहे.

ताज्या घडामोडींसाठी फेसबुक पेज ला लाईक करा

Facebook Pagelike Widget

Recommended For You

Leave a Reply

Your email address will not be published. Required fields are marked *