अर्थसंकल्पीय अधिवेशनाच्या पहिल्या दिवशी ८ हजार ६०९ कोटी रुपयांच्या पुरवणी मागण्या दोन्ही सभागृहात सादर

राज्य विधीमंडळाच्या अर्थसंकल्पीय अधिवेशनाला आजपासून मुंबईत सुरुवात झाली. यात उपमुख्यमंत्री अजित पवार यांनी ८ हजार ६०९ कोटी १७ लाख रुपयांच्या पुरवणी मागण्या दोन्ही सभागृहात मांडल्या. यात अवकाळी पाऊस, गारपीट यामुळं बाधित शेतकऱ्यांना नुकसान भरपाईकरता १६०० कोटी रुपयांहून अधिक रकमेची तरतूद आहे.

कृषीपंप, यंत्रमाग आणि वस्त्रोद्योग क्षेत्रासाठी वीजबिलासाठीच्या अनुदानासाठी पावणे चौदाशे कोटी रुपयांहून अधिक तरतूद प्रस्तावित आहे. डिसेंबरमध्ये सरकारनं ५५ हजार ५२० कोटी रुपयांच्या पुरवणी मागण्या मांडल्या होत्या. यापूर्वी विरोधी पक्षनेते विजय वडेट्टीवार यांनी आंदोलन करणाऱ्या आशा सेविकांच्या मागण्या मान्य करुन त्यांना न्याय देण्याची मागणी विधानसभेत केली. सरकार याप्रकरणी गंभीर आणि सकारात्मक आहे.  मात्र आताच सगळ्या मागण्या पूर्ण कराव्यात असा आग्रह चुकीचा असून थोडी लवचिक भूमिका स्वीकारली तर मार्ग निघेल, असं आश्वासन अजित पवार यांनी दिलं.

दोन्ही सभागृहात माजी मुख्यमंत्री मनोहर जोशी आणि विद्यमान सदस्य राजेंद्र पाटणी यांच्या निधनाबद्दल शोकप्रस्ताव शोक प्रस्ताव संमत झाला. या मान्यवरांना आदरांजली अर्पण करुन दोन्ही सभागृहांचं आजचं कामकाज संपलं. कामकाज सुरू होण्यापूर्वी विधान भवनाच्या पायऱ्यांवर ओबीसी आणि मराठा आरक्षणप्रश्नी विरोधकांनी आंदोलन केलं.