अविरत कोसळणार्‍या पावसामुळे राज्यातील जलाशयांच्या पाणी पातळीत वाढ

मुंबई, दि. १५ : राज्यात अनेक ठिकाणी अद्याप पावसाचा जोर कायम असून नदी आणि जलाशयांमधे पाणी पातळी वाढली आहे. राजधानी मुंबईत पावसाला काहीसा उतार पडला असला तरी अधून मधून जोरदार सरी येत आहेत. मुंबईला पाणी पुरवठा करणारं तानसा धरण भरलं असून या धरणातून रात्री उशिरा ९३ पूर्णांक ७९ शतांश क्यूसेक्स पाण्याचा विसर्ग सुरू करण्यात आला आहे. धरणाखालील या वाहत्या पाण्यात कोणत्याही प्रकारची अनुचित घटना घडू नये म्हणून ठाणे आणि पालघर जिल्हा प्रशासनाने तानसा नदीच्या काठावरील गावांना सतर्कतेचा इशारा दिला आहे. नदीपात्रात उतरायला आणि पोहायला मनाई करण्यात आली आहे. याशिवाय स्थानिक पातळीवरील प्रशासन नदी काठावरील गावकऱ्यांच्या हालचालींवर लक्ष ठेवून असून नदी पात्रात कोणी उतरणार नाही याची खबरदारी घेतली जात आहे. ठाणे आणि पालघर जिल्ह्यातील ३३ गावे तानसा नदी काठावर आहेत. या ३३ गावांपैकी १८ गांवे ठाणे जिल्ह्यातील शहापूर आणि भिवंडी तालुक्यातील आहेत. तर उर्वरित १५ गावे पालघरच्या वाडा तालुक्यातील आहे. या ३३ गावांतील ग्रामस्थांना महसूल यंत्रणेसह ग्रामपंचायत कर्मचार्‍यांच्या माध्यमातून सतर्कतेचा इशारा दिला आहे.

नाशिक जिल्ह्यातल्या ११ धरणांमधून विसर्ग

शहराला पाणीपुरवठा करणारं गंगापूर धरण ६३ टक्के भरले असून मुकणे धरण ७२ तर वालदेवी धरण ९४ टक्के भरले आहे. गौतमी गोदावरी ८२ टक्के तर कश्यपी धरण ६९ टक्के इतके भरले आहे. भावली, वाघाड, आळंदी, हरणबारी, ओझरखेड, तिसगाव, केळझर ही छोटी धरणे १०० टक्के भरली आहेत. निफाड तालुक्यातील नांदूरमध्येश्वर बंधाऱ्यातून सध्या ३८ हजार क्यूसेक विसर्ग सुरू आहे. दारणा धरणातून ११ हजार तर गंगापूर धरणातून ७ हजार क्यूसेक विसर्ग सध्या सुरू आहे.

नंदुरबार जिल्ह्यातल्या अतिदुर्गम भागात नर्मदा किनारच्या भागात गेल्या चार दिवसात अतिवृष्टीमुळे अनेक ठिकाणी दरडी कोसळल्याने व रस्ता वाहुन गेल्याने अनेक भागांचा संपर्क तुटला आहे. या भागाची जिल्हाधिकारी आणि सर्व खाते प्रमुखांनी बोटीनं जाऊन पाहणी केली. चिमलखेडीसह परिसरातल्या आदिवासी बांधवांशी संवाद साधत जिल्हाधिकाऱ्यांनी यावर तात्काळ उपाययोजना करण्याच्या सूचना संबंधित यंत्रणांना दिल्या. तब्बल चार दिवसांनंतर अमरावती-सुरत राष्ट्रीय महामार्गावरची नंदुरबार जिल्ह्यातून जाणारी वाहतूक सुरळीत झाली आहे. सरपणी नदीला आलेल्या पुराचे पाणी विसरवाडी इथल्या पर्यायी पुलावरुन वाहत असल्याने ही वाहतुक चार दिवसांपासुन बंद करण्यात आली होती.

भंडारा जिल्ह्यात वैनगंगा नदीवरच्या गोसीखुर्द धरणाचे ३३ दरवाजे उघडण्यात आले असून नदीकाठच्या गावांना अतिसतर्कतेचा इशारा दिला आहे. भंडारा आणि गोंदिया जिल्ह्यात गेल्या काही दिवसात झालेल्या मुसळधार पावसामुळे वैनगंगा नदीच्या जलसाठ्यात मोठ्या प्रमाणात वाढ झाली आहे. सातारा जिल्ह्यात कोयना आणि इतर धरण क्षेत्रात पावसाचा जोर कायम आहे. कोयना धरणाच्‍या पायथा विजगृहातून सध्‍या २१०० क्‍यूसेक इतक्‍या पाण्‍याचा विसर्ग सुरु आहे. जिल्ह्यातल्या कोयना, कृष्‍णा, वेण्‍णा नद्यांतील पाणीपातळीत प्रचंड वाढ झाली आहे. धरणातून पाणी सोडण्‍यात येत असल्‍यानं नदीकाठच्‍या गावांना सतर्कतेचा इशारा देण्‍यात आला आहे. कोयना आणि वारणा धरणाच्या पाणलोट क्षेत्रात सतत पाऊस पडत असून दोन्ही धरणातून पाण्याचा विसर्ग सुरू झाल्यामुळे सांगली शहरासह नदीकडच्या गावांना पाण्याचा धोका निर्माण झाला आहे. कृष्णा आणि वारणा नदीवरील १३ बंधारे पाण्याखाली गेले आहेत. संभाव्य पुराचा विचार करून पूर पट्ट्यात राहणाऱ्या सुमारे २ हजार कुटुंबांना स्थलांतर करण्याच्या नोटिसा महापालिकेने बजावल्या आहेत. तसंच आपत्ती व्यवस्थापन यंत्रणा सज्ज आहे. सांगली महापालिका आणि पोलीस यंत्रणे मार्फत, कृष्णा नदी पात्रात होडी चालकांचं प्रात्यक्षिक घेण्यात आलं.